Gjyqtarja e Posaçme Irena Gjoka jep dorëheqjen nga shqyrtimi i dosjes “Toyota Auris”, ku të pandehur janë marrë ish-kryeprokurori i Vlorës, Aurel Zarka, ish-oficerja gjyqësore, Erjona Daupaj, avokati Radovan Çela dhe Astrit Vladi.
Kjo kërkesë për dorëheqje i është pranuar nga zv.Kryetari i Gjykatës. Sipas shortit elektronik kjo dosje i ka rënë gjyqtarit Erjon Çela.
Gjyqtarja ka shqyrtuar më herët çështjen e sekuestrimit të pasurive të Suel Çelës kreu i një organizate kriminale me bazë të gjerë dhe rezulton se kjo pika është një nga akuzat që rëndon ndaj të pandehurve.
Po ashtu, në komunikimet në aplikacionin Sky Ecc ata kanë diskutuar për mënyrën sesi do të ndikonin sistemin e drejtësisë për të çliruar nga sekuestro pasuritë e Çelës. Për këtë shkak, gjyqtarja ka vlerësuar se është në konflikt interesi dhe se mund të jetë dhe dëshmitare në proces.
Pas përfundimit të hetimeve, në 4 janar të këtij viti SPAK dërgoi zyrtarisht për gjykim dosjen penale “Toyota Yaris” duke marrë të pandehur ish-kryeprokurorin e Vlorës, Aurel Zarka dhe funksionarët e tjerë të drejtësisë ish-oficeren e policisë gjyqësore pranë ish-prokurorisë për Krime të Rënda, Erjona Daupaj, avokatin Radovan Çela dhe Astrit Vladin.
Katër të pandehurit e dosjes “Toyota Yaris” akuzohen për korrupsion, zbulim të të dhënave sekrete dhe trafik droge.
Prokuroria e Posaçme, SPAK përfundoi në dhjetor të 2024-ës hetimet ndaj drejtuesit të pezulluar të prokurorisë së Vlorës, Aurel Zarka dhe funksionarëve të tjerë të drejtësisë.
