Sali Berisha, në nisje të seancës së sotme plenare i ka përsëritur mazhorancës kërkesën për ngritjen e një komisioni të ri parlamentar, Komisionit të së Vërtetës.
Berisha tha se duhen nxjerrë para shqiptarëve lidhjet e politikës me krimin dhe të zbulohet se cili prej politikanëve ka qenë përdorues i aplikacionit “Sky Ecc” dhe “EncroChat”.
Sipas liderit demokrat, Edi Rama ka patur 2-3 kode në këto aplikacioni, duke rikujtuar dëshmitë e partneres së Charls McGonigal.
Berisha paralajmëroi se nëse nuk ngrihet komisioni i së vërtetës, Partia Demokratike do t’i publikojë një më një të gjitha faqet e bisedave të ardhura nga partnerët ndërkombëtarë.
“Nuk është TikTok rrugaçi që thotë “Ajatollahu i Tiranës”, por është EncroChati, krimineli, vrasësi, trafikanti. Të krijohet komisioni i së vërtetës sipas propozimit të Sulës, për të nxjerrë para shqiptarëve veçanërisht para zgjedhjeve, lidhjet e politikës me krimin, i cili është kusht i domosdoshëm. Ka patur këtu me 2-3 EncroChat-e. Damian se po flas unë. Ke pasur dhe ti. Betohu se nuk ke pasur. Mos u fsheh. Kryeministri juaj ka pasur 2 ose 3 të tillë. Kryeministri ka patur 2-3 të tillë.
Harruat ju si e denoncoi bashkëjetuesja e McGonigal kur tha se nuk e lëshonte për orë të tëra në SkyEcc me Edi Ramën. I harruat këto? Është më mirë t’i zbardhim vetë. PD ato 1 mln faqe që kanë ardhur, nëse ju nuk pranoni komisionin, do t’i publikojë një nga një. Do ta bëjmë ne të vërtetën para shqiptarëve. Prandaj mos kini frikë”, deklaroi Berisha.
