Tek Bayern i Mynihut duket se po ndryshojnë strategji. Nëse deri sot ishim mësuar të shihnim klubin bavarez të ishte një prej skuadrave me potencialin më të madh financiar jo vetëm në Gjermani, por edhe në Evropë, tashmë duket se gjermanët kanë ndryshuar plan.
Strategjia do të jetë e diktuar sigurisht edhe nga kriza financiare, që ka prekur edhe klubet më të mëdhenj të Evropës. Revolucioni do të nis nga pagat e futbollistëve, të cilat aktualisht kanë pësuar rritje nga 320 mln euro në 340 mln euro. Nuk do të ketë më lojtarë të mbi paguar, me bavarezët që do të synojnë të mbështesin lojtarët e rinj e të talentuar që kanë në gjirin e tyre.
Kështu bordi i Bayernit duket i qartë në pozicionimin e tyre. Objektivi do të jetë rinovimi i Davies deri në 2030 e më pas zgjatja e kontratave dhe mbështetja tek lojtarët e rinj si Pavloviç (20 vjeç) dhe Bischlof (19 vjeç). Me Thomas Mullerin që është në perëndimin e karrierës edhe senatorët e tjerë nuk duket se do të kenë më vend në projektin e së ardhmes tek bavarezët.
Kështu Leon Goretzka duket se nuk do të rinovojë pas përfundimit të sezonit. E përditshmja gjermane “Sport Bild” bën me dije ditën e sotme se vendimi tashmë është marrë, pas takimit të drejteusëve më të lartë të klubit dhe agjentëve të mesfushorit.
Goretzka do të largohet me shumë gjasë menjëherë pas përfundimit të sezonit. Në këtë mënyrë do të niset të vihet në jetë projekti i Bayernit, për shfryrjen e buxhetit të klubit, dedikuar pagave tepër të larta, që aktualisht ka në klubin më të titulluar në Gjermani.
