Nga Basir Çollaku
Shkodranët, si nana e humorit, kanë prodhuar mes pafundësisë së krijimeve edhe skeçin “Kola i dritave”. Në atë histori, ku gjithë ndërmarrja bënte mbledhje me javë me e bind Kolën e shkretë se ke harru dritën e zyrës ndezë, e pjesa tjetër shinte livadhin e nuk bënte kokërr pune, se udhëheqja kishte punë me Kolën. Më duket se strategjia e SPAK për zgjedhjet 2025, ka pak “Kolë” brenda saj. Në atë çfarë Struktura ka publikuar, ka një harresë të mëkateve të vjetra, duke tentuar të rrijë gati për të rejat, ndonëse edhe këtu firot janë të dukshme.
Përse?
Struktura vë në krye drejtuesin për krimin elektoral, duke ofruar bashkëpunim me Policinë e Shtetit Komisionerin dhe Prokuroritë e Juridiksionit të Përgjithshëm, duke lajmëruar edhe nënshkrime marrëveshjesh. Nuk mjafton Kodi Penal, i procedurës dhe Kushtetuta si bashkësi ligjore, për të kryer veprimet hetimore në kohën e dobishme për rezultat? Grupet në terren në 12 qarqe e 61 bashki, janë një mangësi burimesh njerëzore, për të cilën Struktura ka kërkuar në Kuvend disa herë shtesa në numër. Është ky moment për një sforco shtesë të qeverisë për të zgjidhur qese dhe emra? E kjo kompromenton më pas seleksionimin! Po gjykatat? Cili do të jetë roli i tyre? Sepse vendimmarrja nuk do të presë radhën pas përfundimit të procesit! A e kanë shprehur ata dakordësinë? Sepse ata e kanë një kalendar seancash, të cilave u përfundojnë apo digjen afatet. Janë 150 mijë dosje stok, në pritje të shqyrtimeve. A janë konsultuar bashkarisht? A ka një njësi, ku edhe policia të jetë në sinkronë me këtë akt dhe fakt disi kaotik para zgjedhjeve?
Po trashëgimia, sa premtuese është?
Nëse kthehemi në zgjedhjet e mëparshme, të dhënat nuk janë fort të qeshura. Dosja “184” është dosja dështuese e krimit elektoral në Dibër, në zgjedhjet e pjesshme 2016, ku nuk mungon as Prokuroria e Posaçme. Udhëtimet e saj Peshkopi-Tiranë, pas daljes nga arkivat e Krimeve të Rënda, janë provë e ndikimit politik të moszbardhjes e mosmarrjes së vendimeve në kohë, ku të ketë vlerë vendimi. Sa herë shkuan të pyeten në SPAK për këtë krim zgjedhor Edi Rama, Ulsi Mania, Saimir Tahiri, Pjerin Ndreu e shumë deputetë e drejtorë të administratës e policisë, të dalë në përgjime? Përgjime të bëra publike nga gazeta më e madhe në Europë, gjermanja “Bild”. Po dosja “339”, sërish me krim elektoral, ku Struktura në vonesën e hetimeve gjeti dy komisionerë, të cilët kishin ndërruar jetë, teksa ishin në kërkim për marrjen në pyetje? Po mbi 100 kallëzime të opozitës, të PD, për zgjedhjet e 2021, prej të cilave vetëm 7 kanë marrë vëmendje hetimore? Po katastrofa hetimore për vrasjen e 21 prillit të zgjedhjeve të 2021 në Elbasan, ku prokurori Alfred Shehu dhe drejtori i Përgjithshëm i Policisë së Shtetit, Ard Veliu gënjyen publikisht, se në makinën e të kërkuarit Greca nuk ka material elektorale? Deklarimet e tyre u rrëzuan më pas me prova në gjykatë. Por, të dy dëmtuesit e hetimit u shpërblyen. Njëri zëvendësministër e tjetri u përcoll në SPAK nga prokuror në Elbasan.
Po dosjet sky-enchro?
Janë së paku katër qarqe të rrëzuara nga dosjet e ardhura nga Franca, Belgjika dhe Holanda, të dosjeve të prodhuara nga përgjimet e aplikacioneve, sky, enchro, matrix etj. Elbasani, Shkodra, Durrësi e Tirana kanë dëshmi tronditëse. Metamorfoza, revanshi me shumë kapituj rrëfejnë krim elektoral nga zgjedhjet 2017, 2021 e deri në ato të vitit 2023, e tashmë në pritje të vijimit në 2025, ku ka ministra, deputetë, bashkiakë e drejtorë të përfshirë. Po sipas deklarimeve të Dumanit, në këto dosje ka prokurorë, gjyqtarë e oficerë policie në komunikime ndere e favore me bandat. Vetëm në një dosje të tillë, ka afro 40 prokurorë, gjyqtarë, oficerë police të përmendur. Po në të tjerat? A do të jenë këta të dyshuar nga Prokuroria, Gjykata, Policia, në ekipet Task Forcë, për të hetuar vetveten dhe të dyshuarit e grupeve ku dalin emërpërmendur?! Po rasti “Beleri” ku nisi hetime rrufe Vlora, pas betimit nëpër ekrane të kryeministrit Edi Rama, se do merrej personalisht, në shkelje flagrante kompetencash ligjore, e pastaj u dërgua në SPAK, aty ku ka vendime gjykate për procedurën dhe kryerjen e veprimeve të dyshuara të falsifikuara, e të cilave Prokuroria nuk iu bindet?!
Më duket se Kola e ka harruar akoma dritat ndezë…
