Qarkullimi i masave ajrore me origjinë Jugperëndimore do të sjellë mot të paqëndrueshëm në territorin shqiptar, ku zonat e ulëta dhe bregdetare do të dominohen nga vranësira dhe rrebeshe shiu ndërsa në zonat e thella malore do të ketë reshje dëbore. Parashikohet që pjesa e dytë e ditës dhe në vijim të vijojë nën ndikimin e motit të paqëndrueshëm, ku reshjet do të mbeten prezent në të gjithë vendin.
Temperaturat e ajrit do të pësojnë rritje në mëngjes, por ulen maksimumet duke luhatur vlerat ditore nga 2°C vlera minimale e shënuar në zonat verilindore deri në 19°C vlera maksimale e cila pritet përgjatë vijës bregdetare. Era do të fryjë mesatare deri e fortë gjatë gjithë ditës duke arritur shpejtësinë maksimale deri në 55 km/h nga drejtimi Jugor; për pasojë në brigjet detare do të krijohet dallgëzim mbi 3 ballë.
Kosova
Republika e Kosovës do të jetë nën dominimin e masave ajrore me origjinë jugore dhe jugperëndimore duke sjellë dominim të vranësirave dhe reshjeve të shiut dhe dëborës, ku më të dendura do të jenën në zonat kufitare me Shqipërinë. Gjatë pasdites dhe në vijim, Kosova mbeten nën dominimin e vranësirave dhe shirave, por në sasi më të pakta. Ndërsa temperaturat e ajrit do të pësojnë rritje në vlerat minimale, por ulen maksimalet duke u luhatur nga -2°C minimalja e shënuar në qytetin e Podujevës deri në 12°C vlera maksimale e cila do të shënohen në Gjakovë. Era do të fryjë mesatare dhe e fortë gjatë gjithë ditës duke arritur shpejtësinë maksimale deri në 55 km/h nga drejtimi permanent jugor.
Maqedonia e Veriut
Masat ajrore me origjinë jugperëndimore do të kushtëzojnë motin edhe në republikën e MV, ku vranësirat e shpeshta do të jenë dominante gjatë paradites duke gjeneruar herë pas here reshje shiu e dëbore në zona të thella malore. Parashikohet që pasditja dhe mbrëmja të sjellin shtim të vranësirave dhe shirave në të gjithë territori i MV. Temperaturat e ajrit do të pësojnë rritje në vlerat minimale, por ulen maksimalet duke u luhatur nga -2°C vlera minimale e shënuar në Dibër deri në 12°C vlera maksimale në qytetin e Shkupit. Era do të fryjë mesatare gjatë paradites, por forcohet në pjesën e dytë të ditës duke arritur shpejtësinë mbi 50 km/h nga drejtimi permanent Jugor.
Evropa
Vendet skandinave, ishujt britanikë si edhe pjesa më e madhe e rajonit të Baltikut do të përfshihen nga masa ajrore të paqëndrueshme duke kushtëzuar në këto rajone, reshje shiu e dëbore ndërsa pjesa më e madhe e Europës Jugore, gadishulli Apenin si edhe gadishulli i Ballkanit do të jenë nën ndikimin e vranësirave dhe reshjeve të shiut si pasojë e masave ajrore të ngrohta me origjinë Oqeanike. Nën dominimin e motit të kthjellët dhe vranësirave të lehta e kalimtare do të paraqiten vendet e Europës Lindore si edhe pjesërisht qendra e kontinentit.
