Statistikat e publikuara nga INSTAT për periudhën janar- dhjetor 2024 tregojnë se janë regjistruar 1.666 aksidente, në krahasim me të njëjtën periudhë të vitit 2023, ku janë shënuar 1.285 aksidente. Këto shifra reflektojnë një rritje të ndjeshme të aksidenteve në Shqipëri përgjatë vitit 2024.
Gjithashtu për vitin 2024, vdekshmëria në aksidente rrugore është 10.5 për 100 aksidente, nga 14.9 që ishte në të njëjtën periudhë të një viti më parë.
Ndërkohë, në muajin dhjetor 2024, numri më i lartë i aksidenteve rrugore ka ndodhur përgjatë ditës së martë me 20.1 %, ndërsa numri më i ulët i aksidenteve ka ndodhur përgjatë ditës së premte me 10.1%.
Nga ana tjetër, sjellja e drejtuesve të automjeteve është faktori dominues në 89.3 % të rasteve për shkaktimin e aksidenteve.
Sipas të dhënave, numri më i lartë i aksidenteve rrugore ka ndodhur përgjatë harkut kohor 08:00-12:00, duke zënë 26.2 % të numrit të aksidenteve rrugore gjithsej.
Përsa i përket përhapjes gjeografike, qarku i Tiranës duke marrë në konsideratë numrin më të madh të popullsisë është më i ekspozuar ndaj riskut të kryerjes së aksidenteve. Tirana mban vendin e parë për numrin më të lartë të aksidenteve me 552 aksidente, ndërsa Berati regjistron numrin më të ulët me 30 aksidente përgjatë vitit 2024, thuhet në raportin e INSTAT./SCAN
