Dhjetëra automjete janë bllokuar ditën e sotme në rrugën Maqellarë-Peshkopi. Mësohet se tre orësh është bllokuar për shkak të punimeve që po bëhen në lotin e tretë të rrugës së Arbrit në segmentin Herebel- Peshkopi.
Mes të bllokuarve ka dhe të sëmurë që janë nisur drejt spitalit të Dibrës, por askush nuk ka ndërmarrë ndonjë veprim për të hapur rrugën dhe për të lejuar transportimin drejt spitalit.
Për shkak se ndërtimi i kësaj rruge po bëhet në gjurmët e rrugës ekzistuese, mjetet nuk kanë alternativë tjetër për të qarkulluar drejt Peshkopisë apo Tiranës. Sipas udhëtarëve, kompania që po ndërton këtë pjesë të fundit të rrugës së Arbrit ka nisur punën tani në prag zgjedhjesh.
