Një ditë pas ndarjes nga jeta të Anastas Janullatos po mbahen homazhe në Mitropolin e Shenjtë të Athinës, aty ku ndodhet dhe trupi i kryepeshkopit të Kishës Ortodokse Autoqefale të Shqipërisë.
Të pranishëm në homazhe janë Presidentja e Greqisë, Kryeministri Kyriakos Mitsotakis, Kryetari i Kuvendit, krerë të lartë të shtetit dhe përfaqësues të kishave jo vetëm të shtetit fqinj por dhe nga Shqipëria.
Trupi i primatit të bekuar do të qëndrojë për nderim publik deri mëngjesin e së hënës dhe më pas do të transferohet drejt Tiranës.
Edhe në Shqipëri do të mbahen po ashtu homazhe, të cilat në shumë qytete të vendit kanë nisur që prej ditës së shtunë.
Dhjetëra besimtarë janë falur këtë të diel pranë fotos së kryepeshkopit Anastas në meshën e rastit, në kishën e Shën Gjergjit Fier. Mesha tradicionale e të dielës ka qenë njëherazi dhe një homazh për ndarjen nga jeta të kryepeshkopit Anastas Janullatos.
Edhe në Katedralen ‘Shën Dhimitri’ në Berat mbrëmjen e djeshme besimtarë të shumtë janë lutur Për shpirtin e shenjtit.
Në vendin tonë pritja e trupit të Kryepiskopit të ndjerë do të bëhet para Katedrales ‘Ngjallja e Krishtit’ në Tiranë, më 28 janar në orën 16:00.
Homazhet do të mbahen brenda tempullit gjatë asaj pasditeje dhe të mërkurën, datë 29 janar 2025.
Shërbesa e varrimit do të kryhet ditën e enjte, pas Liturgjisë Hyjnore ndërsa varrimi do të bëhet nën Hapin e Shenjtë të Katedrales, në një kriptë të veçantë që kishte përgatitur vetë Anastasi.
