Është mbajtur këtë të shtunë seanca gjyqësore në Gjykatën e Shkodrës për rivlerësimin e masave të sigurisë për 25-vjeçarin Samuel Troshani dhe 24-vjeçarit Izmir Sakica, të cilët u vetëdorëzuan në Polici tre ditë më parë, në prani të avokatit të tyre Sokol Tahiraj.
Ata ishin shpallur në kërkim për dhunimin me sende të forta të Vladimir Bruçit, ngjarje kjo e ndodhur më 3 Qershor të vitit të kaluar në rrugën “Pogej” të lagjes Rus.
Pavarëlsisht pretendimeve të dy të rinjëve dhe avokatit të tyre Sokol Tahiraj, Gjykata ka vendosur t’iu lërë në fuqi masat “Arrest me burg”.
Shkaku i dhunimit të Vladimir Bruçit dyshohet se ishte konflikti i nisur për një parkim të gabuar, teksa si autor të dyshuar të ngjarjes në atë kohë u arrestua vetëm Edmond Sakicajn, teksa u shpallën në kërkim Izmir Sakicaj, Samet Halluni, Arlind Kajoshi, Samuel Troshani.
Nga pamjet filmike të kamerave të sigurisë në zonën ku ndodhi ngjarja Samuel Trioshani dhe Izmir Sakica shfaqeshin edhe të armatosur.
Kur u vetëdorzuan në Policinë e Shkodrës, dy të rinjtë dorëzuan edhe dy armë, një pistoletë e ngjashme e llojit ”Glock” dhe një armë zjarri e dyshuar automatike, duke pretenduar se janë të njëjtat me ato që shfaqen në pamjet filmike.
Samuel Troshani dhe Izmir Sakica pretendojnë se armët janë sportive dhe nuk përmbushin kushtet teknike për të qenë armë zjarri.
Gjithashtu, ata kanë deklaruar në Polici se vendosën të dërzoheshin lidhur me këtë ngjarje për të dhënë sqarimet dhe pretendimet e tyre, duke pretenduar dhe se janë pajtuar me Vladimir Bruçin për konfliktin e 3 Qershorit.
Ndërkohë, Samuel Troshani dhe Izmir Sakica kanë qenë në kërkim policor, por pa masë sigurie edhe në lidhje me masakrën me 4 të vrarë të regjistruar pasditen e 30 Tetorit 2024 në afërsi të Dobraçit.
Pas atenatit, uniformat blu kanë ushtruar kontroll në banesat e tyre për t’i shoqëruar në Polici për t’i marrë në pyetje rreth ngjarjes, por në atë kohë ata nuk janë gjetur.
Pas vetëdorëzimit, një grup i specialistëve të krimeve kundër jetës dhe personit në Drejtorinë e Krimeve të Rënda në Policinë e Shtetit kanë shkuar në Shkodër dhe i kanë marrë në pyetje dhe në lidhje me atë ngjarje.
Ata e kanë mohuar përfshirjen e tyre në masakrën e Dobraçit, madje kanë treguar dhe se ku ndodheshin në momentin kur ka ndodhur atentati.
