Analisti Andi Bushati, i ftuar në emisionin “Të Paekspozuarit” në MCN TV, ka folur për rikthimin e Trump në Presidencë dhe entuziazmin që ka pushtuar Partinë Demokratike në Shqipëri për këtë ngjarje.
Bushati tha se Trump nuk do të sjellë ndonjë ndryshim në Shqipëri, pasi të gjithë “punët” që u duhen amerikanëve në vendin tonë i “rregullon” Edi Rama dhe administrata Trump nuk ka ndonjë shqetësim për demokracinë, ndryshe nga demokratët që pavarësisht problemeve kishin ende vëmendje ndaj disa aspekteve të demokracisë.
Bushati deklaroi se edhe një heqje e mundshme e non-gratës së Berishës, nuk ka ndonjë vlerë, pasi vetë non-grata është ezauruar, duke e përfunduar qëllimin e saj për goditjen ndaj Berishës.
“Nuk është sekret që administrata Trump do të bëjë jë ç’rrënjosje të ndikimit të Soros, i cili influenconte administratën e kaluar të demokratëve, por pyetja që ngre unë është, a mjafton lufta globale e Trump ndaj Soros, për të sjellë një ndryshim minimal në Shqipëri? Dyshoj se jo. Nëse Trump vendos të riaktivizojë procesin e ndarjes së Kosovës, i pari që i del përkrah është Edi Rama, thotë Shqipëria, vendi që përfaqësoj mbështet atë që kërkon Trump. Ju mendoni se administrate e re trampiste, do mendojë, prit se ky Rama është njeri që po shkel demokracinë në vendin e tij, është lider i korruptuar, ka qenë shoku Aleksit? Apo do të thotë ky është sharlatani që na duhet për të mbaruar punën? Dyshoj se mund të ndodhë kjo e dyta.
Shembull tjetër, do të hiqet non-grata? Nëse hiqet non-grata sot nuk ka asnjë vlerë. U ezaurua. Ajo kishte dy qëllime, ti jepte zarave të Ramës PD-në, nuk e arriti këtë dhe e dyta, të shërbente si paketë propagandistike që SPAK-istët të thoshin na tha Amerika ta çojmë Berishën në burg, këtë e arritën. Sot edhe po t’ja heqësh non-gratën, SPAK-u do vazhdojë ta përndjekë. Pra, PD-ja e tejkaloi këtë të non-gratës. Frika ime është që sot në Amerikë ka ardhur në pushtet një administratë shumë më pak e vëmendshme, e ndjeshme ndaj demokracisë liberale, ndarjes së pushteteve, një loje demokratike. Si njeri që bën deal, Trump do liderë të forta, nuk vlen vetëm për Shqipërinë. Rama i mbyll këto punë. E njëjta gjë në rajonin tonë do të ndodhë edhe për Vuçiç. Demokratët e qelbën por kishin një lloj ndjeshmërie, për promovimin e demokracisë. Kjo erë me Amerikën e Trump ka mbaruar. Kjo më shumë se kujtdo, i leverdis Ramës në Tiranë, Vuçiç në Serbi, Dodik në Bosnje, e me rradhë“, tha Bushati.
