Elon Musk ka kundërshtuar publikisht projektin masiv të inteligjencës artificiale të njoftuar nga Presidenti Donald Trump, i cili parashikon investime deri në 500 miliardë dollarë në një kompani të re të quajtur Stargate.
Musk, duke i referuar një burimi të tij të besuar, tha se “SoftBank” kishte siguruar më pak se 10 miliardë dollarë për projektin dhe akuzoi se mbështetësit e Trump nuk kishin para të mjaftueshme. Ai e bazoi këtë me informacionin se SoftBank kishte vetëm 24.3 miliardë dollarë në bilanc dhe mund të kishte vështirësi për të mbështetur një projekt të tillë nëse resurset financiare nuk ishin të mjaftueshme.
Këto komente janë të lidhura me një mosmarrëveshje të vazhdueshme midis Musk dhe Sam Altman, CEO i OpenAI, një prej partnerëve kyç të projektit Stargate. Musk është në një proces gjyqësor me Open AI, duke e akuzuar atë për ndryshimin e misionit të tij jofitimprurës dhe për përdorimin e teknologjisë AI për përfitime private.
Përgjigja e Altman ndaj Musk, në të cilën ai e akuzon për keqinterpretim të situatës, thekson se ky investim është një mundësi e madhe për SHBA-në, dhe ai shpreson që Musk, në pozitat e tij të reja, të vendosë interesat e vendit para kompanive të tij.
Në anën tjetër, burimet e përfshira në projektin “Stargate” kanë mohuar pretendimet e Musk, duke theksuar se kompanitë si “SoftBank”, “Oracle” dhe “OpenAI” kanë mundësi të rrisin kapitalin përmes borxhit dhe investitorëve të tjerë, dhe se ato kanë mjaftueshëm fonde për të mbështetur një projekt të tillë.
