Presidenti i Ukrainës, Volodymyr Zelensky, ka deklaruar se “të paktën 200,000” trupa aleate do të nevojiten për të zbatuar çdo marrëveshje paqeje në Ukrainë.
Duke folur të martën në Forumin Ekonomik Botëror në Davos të Zvicrës, Zelensky i ka kërkuar Evropës “të kujdeset për veten” tani kur Donald Trump është kthyer në pushtet në SHBA, raporton The Guardian.
“Nga të gjithë evropianët? 200,000, është një minimum. Është një minimum, përndryshe nuk është asgjë”, është shprehur ai.
Ai ka përmendur përfshirjen e trupave të Koresë së Veriut në luftën e Moskës kundër Kievit, me luftimet që po zhvillohen në rajonin Kursk të Rusisë perëndimore, afër kufirit lindor të Ukrainës.
“Të mos harrojmë se nuk ka asnjë oqean që ndan vendet evropiane nga Rusia. Udhëheqësit evropianë duhet të kujtojnë se këto beteja që përfshijnë ushtarë të Koresë së Veriut po ndodhin tani në vende gjeografikisht më afër Davosit sesa Phenianit”, është shprehur ai.
Zelensky ka përjashtuar mundësinë e reduktimit të ushtrisë së Ukrainës në një të pestën e madhësisë së saj prej 800,000 trupash, që është një nga kërkesat e Kremlinit.
