Policia e Beratit arrestoi me 23 nëntor të vitit 2024 një 56-vjeçar pasi dyshohet se shiste vaj ulliri të reklamuar si bio, ndërsa në realitet produkti ishte i një cilësie të ulët.
Po në atë kohë policia shpalli në kërkim djalin e tij, shtetasin D. A., 29 vjeç, për përfshirje në këtë aktivitet të paligjshëm.
Këtë të shtunë të 18 janarit 2025 policia arriti të arrestonte dhe 29-vjeçarin D.A., ndërsa babë e bir, banues në fshatin Tapi, Kuçovë, akuzohen për veprat penale “Fshehja e të ardhurave” dhe “Mashtrimi me produktet ushqimore”, kryer në bashkëpunim.
Ky shtetas ishte shpallur në kërkim në kuadër të operacionit policor të koduar “Oil”, për veprat penale “Fshehja e të ardhurave”, “Mashtrimi me produktet ushqimore”, kryer në bashkëpunim.
Babë e bir përfunduan në pranga pas denoncimit të marrë nga gazetarët e një emisioni investigativ pasi dyshohet se kishin përshtatur një ambient në banesën e tyre ku përgatisnin përzierje të vajrave të ndryshëm dhe produkteve të panjohura, më pas i reklamonin dhe i shisnin si “Vaj Ulliri Bio Jugu”.
