Janë zbardhur detaje të reja nga hetimet për atentatin e regjistruar pasditen e të hënës në autostradën Fier-Vlor, ku u ekzekutua 30-vjeçari Kristian Marku alias Bardhi nga Rrësheni.
Viktima ka qenë duke udhëtuar në drejtim të Vlorës me një automjet tip “Volkswagen Passat”, në momentin kur autorët i kanë dalë paralel me një automjet tip “Golf” dhe e qëlluan për vdekje.
Nga hetime paraprake, dyshohet se Kristian Marku është eliminuar për shkak hakmarrje, por megjithatë, Policia nuk ka dalë ende në një konkluzion përfundimtar dhe për këtë arsye janë disa pyetje që shtrohen në lidhje me këtë ngjarje.
Autorët e dogjën automjetin e tyre në një distancë jo shumë të largët nga vendi ku ndodhi atentatit, ku automjeti që përdorën ishte denoncuar i vjedhur.
Burime pranë grupit hetimor po ashtu bëjnë me dije se edhe targat të cilat i ishin vënë automjetit tip “Golf” i ishin vjedhur një efektivi policie, ditën e ngjarjes në Novoselë, i cili e e kishte parkuar makinën në rrugë.
Ky detaj ngre dyshime se autorët e kanë ditur lëvizjen e Markut drejt qytetit të Vlorës dhe kanë vendosur që të organizohen shpejt, brenda ditës për ta ekzekutuar.
Gjithashtu, nisur dhe nga detaje se targat janë vjedhur në Novoselë ngre deh dyshime se vrasësit mund të jenë nga jugu, edhe pse nuk ka asnjë të dhënë tjetër dhe viktima e kishte hakmarrjen me fisin Reçi në Rrëshen.
Policia nuk e përjashton faktin se ekzekutimi mund të jetë kryer nga persona në Vlorë për llogari të bandave në Rrëshen, kjo edhe për faktin se vrasësit e njihnin mirë zonën.
Ka dyshime se 30-vjeçari Kristian Marku alias Bardhi mund të jenë në pritë nga persona të tjerë, por deri më tani dy pyetje mbeten ende pa përgjigje për grupin hetimor.
Çfarë do të bënte Marku në Vlorë natën e ekzekutimit? Kë do takonte ai dhe kë ka takuar më herët?
Celulari i viktimës ndërkohë ende nuk është hapur, por është dërguar te autoritetet përkatëse që të zbërthehen bisedat e tij për të kuptuar se çfarë e lidhte viktimën me Vlorë.
Të hënën, ditën e vrasjes, Kristian Marku kishte njoftuar bashkëshorten, me të cilën ka edhe një fëmijë, se do të udhëtonte drejt Vlorës, por nuk i kishte zbuluar arsyen e udhëtimit.
Ajo ka dëshmuar për grupin hetimor se të dy qëndronin në Tiranë në apartamente me qira ditore. Po ashtu shtoi se i shoqi përdorte një makinë me qira, të cilën e kishte marrë fillimisht për tri ditë dhe më pas e kishte shtyrë për dhjetë ditë të tjera.
Ndërkohë, sipas xhaxhait të viktimës, Kristian Marku jetonte duke u ruajtur dhe lëvizte vetëm kur ndihej i sigurt.
Policia ka sekuestruar kamerat në njësinë Novoselë për të rënë në gjurmët e personit që grabiti targat që të mund t’i çojë më pas edhe tek vrasësit.
