Policia e Shtetit ka dalë me një komunikatë zyrtare në lidhje me arrestimin në Angli të 34-vjeçarit Edison Muçeku, i cili ishte shpallur në kërkim nga Prokuroria e Posaçme (SPAK).
Autoritetet shqiptare bëjnë me dije se ai është arrestuar nga autoritetet britanike në kuadër të operacionit të koduar “Another”, pas shkëmbimit të informacionit me Policinë e Shtetit.
Raportohet se Edison Muçeku ishte shpallur në kërkim ndërkombëtar, pasi Gjykata e Posaçme ka caktuar ndaj tij masën e sigurisë “Arrest në burg” për veprat penale: “Sigurimi i kushteve dhe mjeteve materiale për të kryer vrasje, në formë të veçantë dhe në bashkëpunim”, “Grup i strukturuar kriminal”, dhe “Pjesëmarrje në grup të strukturuar kriminal”.
Policia bën me dije se Interpol Tirana në bashkëpunim me Interpol Manchester po vijon procedurat për ekstradimin e këtij shtetasi drejt vendit tonë.
Kujtojme se 34-vjeçari akuzohet se nga SPAK se së bashku me shtetasit Albert Zaja, Tori Xheçuka, Florenc Kelmendi dhe Ardit Gjokrosa kanë kryer veprime për të siguruar kushtet dhe mjetet me qëllim vrasjen e shtetasit, Hamza Tërziu më 21 Maj të vitit 2020 në Bulqizë. Kjo ngjarje u zbardh bazuar në bisedat e aplikacionit të enkriptuar “Sky Ecc”.
Edison Muceku dyshohet të jetë pjesë e grupit kriminal të Hektor Xheçukës, 36 vjeç, i njohur edhe me emrin Tor Xheçuka nga qyteti i Burrelit, i shpallur në kërkim nga SPAK pas operacionit “Revanshi”. Në dosjen hetimore të SPAK, thuhet se Hektor Xhecuka ishte pjesë edhe e grupit kriminal të Ervis Martinajt.
Xheçuka, mësohet se fshihet në Dubai, ndërsa dyshohet si vrasës me pagesë, ku për llogari të Ervis Martinajt ka planifikuar vrasjen e Durim Bamit, plan ky i dalë në pah nga hetimet pas zbërthimit të bisedave në aplikacionin SkyECC.
Shtetasi Hektor Xheçuka ka qëlluar me armë drejt banesës së shtetasit Hamza Terziu në fshatin Zënisht si paralajmërim. Nga hetimet rezulon se Hektor Xheçuka në bashkëpunim me shtetasit e përmendur më sipër ka planifikuar që të gjuanin drejt banesës së pabanuar të shtetasi Hamza Terziu, i cili është xhaxhai i Dorjan Terziut.
Pas zbardhje së bisedave ë aplikacionit Sky Ecc. duket se në këtë konflikt është përfshirë dhe familja Gjokrosa pasi pretendohet se shtëpinë e shtetasit Hamza Terziu e ka treguar Ardit Gjokrosa dhe më pas ndaj kësaj banese është gjuajtur me breshëri plumbash.
