Një 17-vjeçar është arrestuar nga Policia e Durrësit, pasi akuzohet se gjatë një konflikti me një bashkëmoshatar të tij, ka qëlluar me armë zjarri pistoletë në ajër.
Në pranga është vënë shtetasi me inicialet A.K. banues në Sukth, teksa ngjarja për të cilën akuzohet ka ndodhur tre ditë më parë, më 7 Janar, në fshatin Kullë të Durrësit.
“17-vjeçari ishte shpallur në kërkim, pasi më datë 07.01.2025, rreth orës 15.30, në fshatin Kullë, Durrës, është konfliktuar për motive të dobëta, me shtetasin H. M., bashkëmoshatar i tij, dhe gjatë konfliktit ka qëlluar me armë zjarri, në ajër.” – thuhet në njoftimin e Policisë.
Efektivët kanë sekuestruar armën e zjarrit të përdorur gjatë ngjarjes.
Materialet procedurale i kaluan Prokurorisë së Durrësit për veprime të mëtejshme, për veprat penale “Prishja e qetësisë publike” dhe “Mbajtja pa leje dhe prodhimi i armëve, armëve shpërthyese dhe municionit”.
