Pas ndërhyrjes së RENEA-s që u lëshuan nga tarraca dhe u futën nga dritarja brenda apartamentit ku ndodhej vajza, është hapur dera, ku janë futur forcat e Policisë dhe prindërit e vajzës.
Mësohet se brenda apartamentit është gjetur vajza në gjendje të rënduar psikologjike, teksa ende nuk dihet nëse është dhunuar apo jo. Gjithashtu, burime për mediat bëjnë me dije se brenda apartamentit janë gjetur dhe armë zjarri pistoletë.
Mësohet se apartamenti ka qenë i marrë me qira nga persona të tjerë, teksa vajza me inicialet S.Q., kishte disa ditë që ishte larguar nga banesa e saj. Babai i saj pretendon se ajo ishte rrëmbyer.
Kujtojmë se ka qenë vetë vajza e cila mesditën e sotme ka telefonuar sallën operative të Policisë për t’i kërkuar ndihmë, pasi pretendonte se po dhunohej nga disa persona në katin e 8-të të një pallati, por kur efektivët mbërritën në vendin e ngjarjes, ajo nuk iu hapi derën.
Ajo nuk pranoi të hapte derën edhe pasi prindërit e saj shkuan aty për të negociuar me të.
Sipas banorëve të zonës vajza ishte marrë peng, teksa dyshohet se është dëgjuar edhe një e shtënë me armë zjarri. Pritet një komunikatë nga ana e Policisë për të sqaruar rrethanat e plota.
Kujtojmë se ngjarja ndodhi në një pallat të ndërtuar në vitet e fundit i ndodhur buzë rrugë “Teodor Keko”, pranë mbikalimit në Unazën e Madhe në Astir. Më konkretisht, në një apartament në katin e 8-të, hyrja C, tek pallati ku ndodhet “Eglo”.
