Kjo është një kërkesë jo dhe aq e zakontë në dyert e gjykatës por edhe për mentalitetin shqiptar.
Kjo padi e depozituar në vitin 2021 në gjykatën e shkallës së parë, kërkon shpalljen si të padenja për të trashëguar pronën dhe si pasojë përjashtimin nga trashëgimia të dy vajzave, “sepse janë sjellë në mënyrë poshtëruese dhe e kanë keqtrajtuar babanë e tyre si në gjallni edhe pas vdekjes”.
‘Duhet të mësohen edhe në të ardhmen që prindi mund t’ia lërë pasurinë atij fëmijë që i shërben. Testamenti duhet të jetë një formë garancie për trashëgimlënësin dhe jo detyrimisht se je djali apo vajza e dikujt duhet të përfitosh testament’ u shpreh Elona Saliaj, avokate.
Por kjo nuk është e vetmja padi kur prindërit kërkojnë që fëmijët të mos trashëgojnë pronat e tyre, pasi nuk i kanë respektuar sa ishin gjallë.
‘Padenjësia është një institut shumë pak i aplikuar për shkak të mosnjohjes së tij. Padenjësia është një dënim civil që do të thotë se secili që është dhunuar nga një trashëgimtar ose nuk është kujdesur nga një trashëgimtar ai ka të drejtë ti drejtohet gjykatës dhe të kërkojë padenjësinë e trashëgimtarit për të përfituar me testament. Kjo aplikohet edhe pas ndërrimit jetë të trashëgimlënësit’ u shpreh avokatja.
Padenjësia parashikohet në nenin 322 dhe nënkupton ato raste kur ai që do të përfitojë pasurinë ka dhuruar apo ka vrarë poseduesin e pasurisë.
‘Nëse bashkëshorti vret bashkëshorten, fëmija vret prindin, babai vret fëmijët në këtë rast trashëgimtarët kanë të drejtë që përpos dënimit penal që është i përcaktuar të kërkojnë edhe dënim civil dhe përjashtimin nga trashëgimia’ u shpreh Elona Saliaj, avokate.TCH
