Policia e Tiranës ka arrestuar një të ri, të cilit i është sekuestruar një sasi e konsiderueshme lëndësh narkotike, pasi e posedonte me qëllim shitjen.
Në pranga në kuadër të operacionit policor të koduar “Rrugica” është vënë shtetasi Jashar Shima, 28 vjeç, banues në Tiranë.
Blutë e kryeqytetit bëjnë me dije se kishin marrë informacione se 28-vjeçari shiste doza kokaine në rrugën “Bakalli”, vend ku dhe ndërhynë dhe bënë kapjen e tij. Raportohet se në momentin që Shima ka konstatuar uniformat blu, ai ka shpërbërë një dozë lënde narkotike kokainë.
Gjatë kontrollit fizik ndaj 28-vjeçarit dhe kontrollit në banesën e tij, shërbimet e Policisë kanë gjetur doza kokainë brenda një bideon dhe rreth 800 gramë kanabis në një çantë, që dyshohet se i posedonte me qëllim shitjen.
Policia raporton se vijon puna për identifikimin dhe kapjen e shtetasve të tjerë të përfshirë në këtë veprimtari kriminale.
Materialet procedurale do t’i kalojnë Prokurorisë së Tiranës për veprime të mëtejshme, për veprën penale “Prodhimi dhe shitja e narkotikëve”.
