Një konflikt me armë zjarri është parandaluar nga Policia e Durrësit, pas një sherri të nisur mes disa personave në një lokal.
Si rezultat, në kuadër të operacionit policor të koduar “Momentum” është arrestuar shtetasi Geront Vrioni, 35 vjeç, banues në lagjen nr. 13 të qytetit bregdetar.
Raportohet se gjatë patrullimeve rutinë, efektivët kanë konstatuar sherrin në ambientet e një lokali në lagjen nr. 13, dhe pas ndërhyerjes, 35-vjeçari është kapur me armë zjarri kalashnikov. Sipas Policisë, konflikti kishte nisur për motive të dobëta mes tyre.
35-vjeçari është arrestuar për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Grupi hetimor, në drejtimin e Prokurorisë së Durrësit, ka nisur hetimet për të zbardhur shkakun dhe rrethanat e konfliktit, ndërkohë që materialet procedurale janë dërguar për veprime të mëtejshme.
