Komisioni Parlamentar i Sigurisë Kombëtare pritet të nis shqyrtimin e disa ndryshimeve të ligjit për të drejtat e të burgosurve. Aktualisht ligji parashikon se një i dënuar të cilit i kanë mbetur 6 muaj vuajtje dënimi mund të kalojë në burg të hapur por kjo praktikë pothuajse nuk zbatohet fare.
Ndryshimi ligjor i propozuar thotë se “një personi të dënuar të cilit i ka mbetur më pak se 2 vjet e 6 muaj burgim për të vuajtur, me kusht që i dënuari të ketë siguruar një kontratë të rregullt pune kalon në atë që njihet si burg i hapur. Kjo do të thotë se i dënuari paradite shkon në punë dhe në darkë kthehet në burgun e hapur.
Nasip Naço, kryetar i komisionit të sigurisë kombëtare propozues i ndryshime në një intervistë për Top Channel thotë se idea e ndryshimeve mori spunto nga paratë e buxhetit të shtetit të cilat alokohen çdo vit për Drejtorinë e Përgjithshme të Bungjeve dhe koston vjetore për mbajtjen e një të burgosuri.
“Kemi rreth 5.000 të dënuar dhe të paraburgosur po aq punonjës policie në burgje dhe punonjës civil që punojnë në administratën e burgjeve. Pra i bie një polic për një të dënuar. Kjo është një shifër tejet e lartë. Duke parë statistikat kjo shifër ishte gati me gishtat e njërës dorë. Këtu perimetri i sigurisë është tejet minimal. Parësore është rehabilitimi dhe integrimi, jo siguria, pasi kemi masë dënimi shumë të ulët. Këtu mund të jetë raporti 1 polic me 1o të dënuar,”, u shpreh Naço.
Vende si Anglia, Gjermania, Holanda, Spanja, Zvicra, Italia, Luksemburgu, Polonia, Mali i Zi thotë Nasip Naço, kanë aplikuar tashmë këtë regjim për një kategori të dënuarish, regjim ky që është vlerësuar tepër pozitiv në drejtim të të drejtave dhe lirive të personave të dënuar.
