Policia e Beratit ka arrestuar një tjetër person, të dyshuar si bashkëpunëtor, i dy vëllezërve Fatjon dhe Marko Maloku nga Durrësi, të dyshuar si autorë të atentatit të regjistruar mbrëmjen e 2 Janarit, në lagjen “Donika Kastrioti”. Raportohet se në pranga është vënë shtetasi Ani Hoxha, 32 vjeç, banues në Durrës.
Sipas Policisë së Beratit, dyshohet se 32-vjeçari, në bashkëpunim me shtetasin Erjol Dylmishi të kapur ditën e djeshme në doganën e Kakavijës, dyshohet se kanë lëvizur nga Berati dhe kanë fshehur në Durrës, automjetin tip “Ford”, nga i cili dyshohet se kanë qëlluar me armë zjarri, vëllezërit Fatjon dhe Marko Maloku.
Shënjestër e atentatit ishin dy shokët Antonio Merkaj dhe Apostol Dhëmbi, të cilët kanë qënë tek “Karaburant Merko” në Berat, kur nga një automjet tip “Ford” i zi ku dyshohet se ndodheshin dy vëllezërit Maloku, është qëlluar në drejtim të tyre.
Merkaj dhe Dhëmbi janë larguar me vrap nga karburanti në drejtim të spitalit, ndërkohë që makina i ka ndjekur nga prapa duke qëlluar me breshëri kallashnikovi në drejtim të tyre.
Ndërkohë që dy shënjestrat janë larguar në brendësi të lagjes “Donika Kastrioti”, atentatorët janë larguar me shpejtësi nga vendi i ngjarjes. Fatmirësisht, asnjë nuk është plagosur nga breshëria e kallashnikovit, as shënjestrat dhe as kalimatrët e rastit.
Vëllezërit Fatjon dhe Marko Maloku vijojnë të jenë ende në kërkim nga Policia. Dyshohet se konflikti mes dy grupeve ka nisur në shtetin grek, për prishje pazaresh droge mes tyre.
