Policia e Shtetit ka evidentuar raste të mashtrimit të qytetarëve përmes numrave të telefonit, konkretisht rrjetit whatsapp. Thotë se janë adresuar shumë ankesa dhe se një pjesë e qytetarëve kanë rënë pre e tyre.
Më i fundit është shpërndarë nëpërmjet rrjetit Whatsapp, duke infektuar shumë qytetarë, mes tyre edhe punonjës të policisë.
Mesazhi është shpërndarë nëpër rrjet me një reklamë joshëse për lojëra kazinosh, duke ofruar aktivizimin e vetëm 10 dollarëve depozitë dhe në këmbim përfitojë bonus 1200 dollarë. Në dukje kjo një reklamë krejt e zakonshme që bëjnë rëndom kompanitë e mëdha të lojërave të fatit nëpër botë për klientët e tyre.
Policia e Shtetit
Nisur nga disa raste të adresuara në strukturat e Hetimit të Krimeve Kibernetike dhe nga monitorimi i vazhdueshëm i burimeve të hapura të informacionit, si dhe platformave virtuale, me qellim evidentimin e veprimtarive të kundraligjshme, kryesisht në fushën e krimeve kibernetike, nga Drejtoria për Hetimin e Krimit në Policinë e Shtetit në bashkëpunim me Sektorin për Hetimin e Krimeve Kibernetike, në Drejtorinë Vendore të Policisë Tiranë, janë konstatuar mesazhe të maskuara në platformën e komunikimit Whatsapp.
Këto mesazhe përcjellin kërkesën për të votuar apo për tu regjistruar në evenimente të ndryshme fiktive, ku pretendohet se pas këtyre regjistrimeve, votuesi apo personi që klikon, do të përfitojë benefite të ndryshme.
Mesazhet, kanë si qëllim orientimin e poseduesve të llogarive, drejt linqeve mashtruese, qëllimi final i së cilave është marrja në posedim, në mënyrë të padrejtë, të profileve në platformën e komunikimit Whatsapp të personave të mashtruar.
Policia e Shtetit informon qytetarët se në rast se ju vijnë të tilla SMS duhet ti fshijnë dhe mos të kryejnë asnjë veprim kundrejt tyre (klikim, plotësim të dhënash etj), të cilat mund të vijnë nga numra kryesisht të huaj, por edhe të personave që i keni kontakt në aparatin tuaj telefonik, që mund t’ju jetë hakëruar Whatsapp-i duke rënë pre e këtyre SMS-ve.
Policia e Shtetit apelon për ata qytetarë që kanë rënë pre e këtyre SMS-ve, të paraqiten në zyrat e Policisë së Shtetit tek strukturat e Krimit Kibernetik, pranë çdo Drejtorie Vendore të Policisë për të denoncuar rastet, me qëllim identifikimin dhe ndëshkimin e autorëve të kësaj veprimtarie të kundraligjshme.
