Janë zbardhur identitetet e dy shqiptarëve të cilët u arratisën mbrëmjen e djeshme nga burgu i Kasavetias në Greqi.
Mësohet se njëri prej tyre është Romeo Qosja, 41 vjeç nga Cërriku, i dënuar nga Gjykata e Athinës me 20 vjet heqje lirie për vrasje, grabitje, shkatërrim prone me zjarr dhe armëmbajte pa leje.
Ndërsa shqiptari tjetër i arratisur është Lefter Toçi, 41 vjeç nga Bradasheshi i Elbasanit, i dënuar nga Gjykata e Athinës me 20 vjet heqje lirie për pjesmarrje në organizatë kriminale, bashkëpunim në vrasje, plagosje me pasojë vdekje, grabitje, shkatërrim prone me zjarr.
Ata ndodheshin në burgun e Kassavetias prej vitit 2019 dhe mbaheshin në një zonë të parrethuar për shkak të sjelljes së mirë. Ata rezultojnë të kenë marrë 5 leje gjatë vitit 2024.
Mesa duket, dy shqiptarët kanë përfituar nga kthimi i tyre nga leja disa ditë më parë, për të planifikuar arratisjen.
