Policia e Beratit ka dalë me një komunikatë për mediat në lidhje me atentatin e dështuar të regjistruar mbrëmjen e djeshme ndaj dy shokëve Antonio Merkaj dhe Apostol Dhëmbi.
Autoritetet bëjnë me dije se kanë identifikuar autorët dhe i kanë shpallur në kërkim, ku bëhet fjalë për vëllezërit Fatjon Maloku, 36 vjeç dhe Marko Maloku, 35 vjeç, të dy banues në Durrës.
Policia e Beratit bën me dije se në bashkëpunim me atë të Beratit po punojnë për kapjen e dy vëllezërve Maloku, teksa nën drejtimin e Prokurorisë vijojnë hetimet intensive për dokumentimin e plotë ligjor të rastit.
Dy shokët Antonio Merkaj dhe Apostol Dhëmbi kanë qënë tek “Karaburant Merko”, kur nga një automjet tip “Ford” i zi ku dyshohet se ndodheshin dy vëllezërit Maloku, është qëlluar në drejtim të tyre.
Merkaj dhe Dhëmbi janë larguar me vrap nga karburanti në drejtim të spitalit, ndërkohë që makina i ka ndjekur nga prapa duke qëlluar me breshëri kallashnikovi në drejtim të tyre.
Ndërkohë që dy shënjestrat janë larguar në brendësi të lagjes “Donika Kastrioti”, atentatorët janë larguar me shpejtësi nga vendi i ngjarjes.
Fatmirësisht, asnjë nuk është plagosur nga breshëria e kallashnikovit, as shënjestrat dhe as kalimatrët e rastit.
Dyshohet se konflikti mes dy grupeve ka nisur në shtetin grek, për prishje pazaresh droge mes tyre.
