Policia e Durrësit ka arrestuar shtetasin Fation Janina, duke zgjatur vetëm disa orë arratia për 39-vjeçarin, i cili akuzohet se pasditen e djeshme vrau fqinjin e tij, Paulin Gina, 82 vjeç, në banesën e këtij të fundit.
I moshuari jetonte i vetëm në banesë, teksa autori i dyshuar Fation Janina e ka vrarë me thika dhe çekiç, duke i prerë fytin, si dhe duke e goditur në fytyrë.
Nga hetimet paraprake dyshohet se krimi ka ndodhur për motive të dobëta, teksa 39-vjeçari njihet si një njeri që konsumonte shpesh alkool dhe nuk përjashtohet pista që të ketë qenë i dehur në momentin e ngjarjes.
Dyshohet se Fation Janina ka shkuar në banesë për t’i kërkuar para të moshuarit dhe pasi ky i fundit nuk i ka dhënë e ka vrarë me thikë.
Pasi ka kryer krimin, 39-vjeçari ka mbyllur me çelës derën nga jashtë, ka fshehur mjetet me të cilat kreu vrasjen dhe më pas është larguar për t’u arrestuar disa orë më pas.
Gjatë kontrollit të ushtruar në banesën e 39-vjeçarit, uniformat blu kanë gjetur dy thika, një çekiç dhe veshjet që dyshohet se ka patur autori gjatë kryerjes së krimit. Raportohet se thika, çekiçi dhe veshjet me njolla gjaku janë dërguar në Institutin e Policisë Shkencore, për ekzaminime të mëtejshme.
Mësohet se mbyllja e derës ka çuar policinë në dyshimet se autori ka qenë person që njihet me viktimën. Sapo kanë nisur hapjet e kamerave të sigurisë së një karburanti aty ngjitur, është konstatuar lëvizja e fundit e viktimës dhe hyrjet dhe daljet e vetme që kanë ndodhur në pallat gjatë kësaj fashe orare.
Nga hyrjet dhe daljet janë konstatuar vetëm lëvizjet e fqinjëve. Në kushte të tilla ka nisur marrja në pyetje e tyre dhe janë ushtruar kontrolle në banesa. Pasi kanë siguruar informacione nëpërmjet rrugëve operative dhe i kanë bashkëngjitur dhe hetimet që janë bërë, blutë e qytetit kanë konstatuar armët e krimit në banesën e Fation Janinës.
Mbi Fatin Janinën rëndojnë akuzat për veprat penale “Vrasja me dashje” dhe “Mbajtja pa leje e armëve të ftohta”, teksa materialet janë referuar në Prokurori.
