Janë publikuar pamjet e arrestimit të të miturit, i cili u prangos nga efektivët e komisariatit nr.6 në kryeqytet, pasi qarkullonte me armë zjarri dhe një dorezë metalike( përforcues grushti) me vete.
Në pranga u vu shtetasi i mitur A.K, 15 vjeç, banues në Tiranë, i cili sipas njoftimit të bluve të kryeqytetit është kapur në Fushë-Mëzez.
Mësohet se arrestimi i të miturit ka ndodhur ditën e djeshme, pavarësisht se Policia e njoftoi sot, por ajo që vihet re është dhuna e ushtruar nga efektivët kundrejt të miturit, sikur ai të ishte një kriminel i shumëkërkuar.
Në pamje e publikuara nga JOQ shihet qartë se si policët e godasin me grushta dhe shpulla në kokë të miturin, ndërkohë që ai ulet për t’u mbrojtur. Më pas policët e shoqërojnë deri te makina 15-vjeçarin, i cili thuhet se është arrestuar pas informacioneve që dikush i kishte dhënë policisë për armët që ai mbante.
Ende nuk dihet se si 15-vjeçari ka arritur të sigurojë një armë zjarri, pistoletë dhe një dorezë metalike, dhe as për çfarë do i përdorte ato.
