Brigjet e Perusë, Ekuadorit dhe Kilit u goditën nga dallgë jashtëzakonisht të forta pasditen e së hënës, duke shkaktuar tre viktima dhe mbylljen e shumicës së porteve peruane.
Valët arritën deri në 4 metra në Peru dhe 2 metra në Ekuador, sipas autoriteteve të dy vendeve.
Në Ekuador, dy persona humbën jetën në Manda, ndërsa një tjetër vdiq në Iquique të Kilit, ku qytetarëve u ishte ndaluar më herët që të notonin për shkak të valëve të larta.
Në Peru, 31 peshkatarë u shpëtuan nga marina, por 180 të tjerë mbetën të bllokuar në det, duke u përballur me mungesë ushqimi dhe karburanti.
Për shkak të dallgëve të forta, 91 nga 121 porte të Perusë u mbyllën, ndërsa kufizime për hyrjen në plazhe u vendosën deri më 1 janar.
Komuna e Callao mbylli plazhet dhe sheshin ikonik Grau, i cili u përmbyt. Dëme të mëdha u regjistruan në varka dhe dyqane në qytetet bregdetare.
