Prokuroria e Posaçme (SPAK) ka dalë me një komunikatë për mediat në lidhje me hetimin e nisur ndaj kreut të Bashkisë së Tiranës, Erion Veliaj, ku ai dëshmoi ditën e djeshme për rreth 5 orë.
SPAK bën me dije se ekzistojnë të dhëna konkrete për 4 akuza lidhur me këtë çështje. Më konkretisht, për veprat penale:
- “Korrupsion pasiv i funksionarëve të lartë shtetërorë ose i të zgjedhurve vendorë”,
- “Korrupsion aktiv i funksionarëve të lartë shtetërorë ose të zgjedhurve vendorë”,
- “Pastrimi i produkteve të veprës penale ose veprimtarisë kriminale”,
- “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim”.
Gjithashtu, SPAK konfirmon se kallëzimi për Veliajn është bërë nga shtetasi i identifikuar si Nesti Angoni, teksa më pas hetuesit e BKH-së kanë bërë verifikimin e të dhënave dhe administrimin e provave dokumentare.
Kallëzimi nga Nesti Angoni, u bë me dije edhe nga vetë Erion Veliaj gjatë reagimit që pati në mbledhjen e Këshillit Bashkiak, ku deklaroi se bëhet fjalë për një denoncim anonim, pasi sipas tij, ky personazh nuk egziston.
Kryebashkiaku i Tiranës e konsideroi denoncimin anonim ndaj tij si një kurth, teksa bëri me dije se do të jetë bashkëpunues me drejtësinë. Në lidhje me denoncimin anonim, Erion Veliaj shënjestroi direkt kundërshtarët e tij politik si autor, duke u shprehur se pasi nuk e mundën dot në zgjedhje, janë kthyer tek beteja me letra anonime.
“Jam denoncuar në mënyre anonime nga një qytetar që quhet Nesti Angoni, i cili është një personazh që nuk ekziston, e dimë çfare emri dhe kulture lincuese përfaqëson ky stil. është nje kurth i sajuar. Jam sulmuar nga Nesti Angoni për të na kthyer mallin e letrave anonime. Disa që nuk na mundin dot në zgjedhje e që nuk na mundin dot në betejë kthehen në zanatin e letrave anonime. Nesti Angoni nuk ekziston dihet se kë përfaqëson. Duke qenë se kryetari i bashkisë ka në zotërim të gjithë regjistrin civil dhe mund të verifikojë qartazi që është një kurth i sajuar. Kam qenë bashkëpunues. Do ishte shqetësuese që kryetari i Bashkisë edhe për kurthe anonime nuk paraqitet.
E di gjithë Tirana ku jetoj unë. E di gjithë Tirana ku banoj unë, ku isha përpara zgjedhjeve, ku vazhdoj pas zgjedhjeve dhe ku do jem deri në fund të kësaj detyre. Unë hyj tek ajo rracë politikanësh që nuk i thotë SPAK-ut SKAP kur nuk i intereson dhe i thotë SPAK kur i intereson për kundërshtarët e vetë. As nuk kam bërë anti protesta, as nuk kam bërë letra anonime, se vij nga një brez jo i letrave anonime. As nuk i them SPAK plaç, kur shkon me letra anonime dhe mundohet. Këtu do jemi, në maj do ju mundim me gjithë letra anonime, me gjithë kurthe dhe me gjithë klithmat e hienave. Këtu do jemi dhe do shikoni ku është populli.” tha Veliaj.
Kryebashkiaku Erion Veliaj u paraqit ditën e djeshme në SPAK, ku qëndroi për mbi 5 orë për t’u marrë në pyetje në lidhje me një hetim të nisur nga dy prokurorët Altin Dumani dhe Ols Dado lidhur me dyshimet për korrupsion.
SPAK ka indicie se Erion Veliaj dhe të afërmit e tij janë implikuar në skemat e përfitimit të parave në rrjetin e kompanive që ka në pronësi biznesmeni shqiptaro-belg Elman Abule.
Ndaj këtij të fundit ka dhe një hetim nga Prokuroria e Tiranës, ku akuzohet se ka ngritur një skemë të pastrimit të parave, ku është pjesë bashkëshortja e tij bashkë me Kristian Boçin dhe Vladimir Avramin. Prokuroria u bllokoi rreth 50 milion euro pasuri që ishte investuar kryesisht në ndërtim, pasi paratë kishin origjinë të dyshimtë. Por sekuestro u hoq disa ditë më vonë kur prokurorja e Apelit, Arta Marku u riktheu pronat të akuzuarve.
Mëngjesin e 6 Dhjetorit, agjentët e BKH-së me urdhër të SPAK, sekuestruan telefonin e bashkëshortes së Veliajt, Ajola Xoxa, dhe ushtruan kontroll në ambientet e qendrës “Harabel” dhe të “Nan Gallery”, të themeluara prej saj. Gjithashtu, u kontrolluan edhe një apartament dhe një vilë në pronësi të vëllait të kryebashkiakut, Arbër Veliaj, biznesin e tij “Gogel Shpk” dhe kompaninë “Rametal Shpk”, në pronësi të biznesmenit Elman Abule.
Ditën e hënë u paraqit në SPAK për t’u marrë në pyetje mbi hetimet në fjalë dhe bashkëshortja e Veliajt, Ajola Xoxa, ku ka dëshmuar për rreth 3 orë para agjentëve të BKH-së.
Kjo ishte hera e dytë që Erion Veliaj paraqitej në SPAK, pasi është paraqitur edhe më 30 Prill të këtij viti, ku dëshmoi për rreth 7 orë në lidhje me inceneratorin e Tiranës.
Reagimi i SPAK:
Në përgjigje të interesit tuaj ju komunikojme: Mbi bazën e informacionit për referimin e veprës penale i datës 08.02.2024- i përpiluar nga hetuesit e Byrosë Kombëtare të Hetimit (BKH), Prokuroria e Posaçme kundër Korrupsionit dhe Krimit të Organizuar ka rregjistruar Procedimin Penal nr.27/2024, i cili fillimisht bën fjalë për veprën penale:“Korrupsion pasiv i funksionarëve të lartë shtetërorë ose i të zgjedhurve vendorë” i parashikuar nga neni 260 i Kodit Penal.
Informacioni për referimin e veprës penale mori shkas nga një kallëzim i bërë nga shtetasi i vetëidentifikuar si N.A. Hetuesit e BKH-së, pas verifikimit të të dhënave dhe administrimit të provave dokumentare, referuan informacionin përkatës për veprën penale, mbi bazën e të cilit u rregjistrua procedimi penal i mësipërm.
Deri në këtë fazë të hetimit paraprak, nga provat e grumbulluara, është arritur në konkluzionin se ekzistojnë të dhëna konkrete, të cilat lidhen jo vetëm me veprën penale të parashikuar nga neni 260 i Kodit Penal, por edhe me veprat penale: “Korrupsion aktiv i funksionarëve të lartë shtetërorë ose të zgjedhurve vendorë” i parashikuar nga neni 245, “Pastrimi i produkteve të veprës penale ose veprimtarisë kriminale” parashikuar nga neni 287/2 i Kodit Penal dhe “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim” parashikuar nga neni 257/a, pgf 2 i Kodit Penal.
Këto vepra janë pasqyruar tashmë edhe në Rregjistrin e Njoftimeve të Veprave Penale pranë Prokurorisë së Posaçme kundër Korrupsionit dhe Krimit të Organizuar.
