Drejtuesi politik i PD-së për Tiranën, Belind Këlliçi ka qëndruar për rreth dy orë në Prokurorinë e Posaçme, ku pas daljes nga godina ka konfirmuar hetimet e SPAK ndaj tij.
Më konkretisht, SPAK po heton ndaj tij në lidhje me një kallëzim të avokatit Idajet Beqiri, të cilin Këlliçi në prononcimin për mediat e quajti “një mashtrues me vendim gjykate”.
Belind Këlliçi është kallëzuar në SPAK për falsifikim të diplomës së shkollës së mesme dhe deklarim të rremë në formularin e vetëdeklarimit si kandidat për deputet dhe kandidat për kryetar bashkie të Tiranës.
Ish-deputeti demokrat deklaroi se kallëzimi dhe hetimi ndaj tij është bërë vetëm për shkakun se ka rrëzuar një skemë korrupsioni me vlerë 1 miliardë euro si ajo e inceneratorit të Tiranës.
Belind Këlliçi deklaroi se është në dispozicion të drejtësisë në lidhje me çdo pyetje apo sqarim që ata kanë nevojë.
“Sot jam paraqitur në SPAK në lidhje me një kallëzim nga një mashtrues i dënuar me vendim gjykate 1 vit para se të lindja. Kam lindur në 1987 kam dhënë të gjitha sqarimet e mia shteruese në raport me të gjitha shpifjet dhe vrerin e hedhur ndaj meje vetëm për shkak se kam rrëzuar një skemë korruptive me vlerë 1 miliardë euro, atë të inceneratorit të Tiranës dhe kam rrëzuar bandën më të madhe të hajdutëve që ka parë Ballkani Perëndimor, atë 5D, kreu i së cilës doli nga kolegët e SPAK.
Jam i hapur në dispozicion të drejtësisë për cdo pyetje dhe çdo sqarim në raport me mua, familjen time apo këdo që është i lidhur me mua nga dita që kam lindur 25.1.9187 e deri më sot.
Për herët të dytë brenda viti kreu i bandës 5D u paraqit në SPAK. Nëse dikush mendon se duke përdorur persona të diskredituar që nga 1986 do më mbyllë mua gojën e ka gabim. Lërini mënjanë dhe më dilni përballë kushdo që do të më intimidojë. Kushdo që ka diçka në raport me mua, me deklaratat e mia, të nxjerrë fytyrën ballë për ballë, ashtu sic e kam nxjerrë unë.” – deklaroi Këlliçi për gazetarët pas daljes nga SPAK.
Në lidhje me akuzat për falsifikim të diplomës së shkollës së mesme, Këlliçi u përgjigj se e ka sqaruar një herë këtë çështje dhe se arsimi është krenaria më e madhe për të
“E kam sqaruar para mediave, e kam sqaruar edhe sot në SPAK, kjo është një çështje që është ezauruar nga mediat në fushatë elektorale dhe nuk kam ndërmend që të jap më sqarime. Arsimi dhe edukimi im është krenaria ime më e madhe. Kam ndjekur ligjin amerikan në cdo praktike që kam ndjekur. Jam një nga krenaritë e Institutit Harry Fullz, mund të shkoni të pyesni aty kush jam unë. Mund të shkoni edhe në shkollën 8 vjecare.
Po jua them, edukimi im është arma ime më e fortë dhe krenaria më e madhe e jetës time. Nëse keni interes për korrupsionin që ndodh çdo ditë, një nga krenaritë e mia më të mëdha është denoncimi që kam bërë për 5D dhe inceneratorin e Tiranës. Kush mendon se do të më intimidojë në rrugëtimin tim, të më dalë ballë për ballë. Më është kërkuar që për disa detaje të hetimit mos të shprehem publikisht.” – tha drejtuesi i PD-së në Tiranë.
Këlliçi gjithashtu konfirmoi se është pyetur dhe në lidhje me pasurinë e partneres së tij, Ana Shkreli, vajza e Artan Shkrelit. Ai tha se e ka deklaruar edhe në media se nuk bashkëjetojnë të dy.
“Jam pyetur per gjithcka, për pasurinë, më pyetën për partneren time që unë dal në media dhe them që unë nuk bashkëjetoj me të. Ajo po kujdeset për familjen e saj, por meqë media shkruan se ne jetojmë bashkë, më pyetën edhe për të. Për gjithçka më kanë pyetur.” – tha Këlliçi.
Po ashtu, ai bëri me dije se është pyetur dhe në lidhje me foton që ka bërë me presidentin amerikan Donald Trump gjatë fushatës për zgjedhjet presidenciale në SHBA.
“Më kanë kërkuar të ruaj sekretin hetimor. Për çdo gjë më kanë pyetur, edhe për foton me Trump, meqë është thënë në media se kam paguar dhjetra mijëra dollarës.” – tha ai.
I pyetur në lidhje me përfundimin e hetimeve paraprake nga SPAK për dosjen “5D”, Këllipi tha se nuk është njohur ende me njoftimin zyrtar, por këmbënguli se përgjegjës për 5D-në është kryebashkiaku i Tiranës, Erion Veliaj.
“Një titullar institucioni që di edhe sa like, share në FB bën një vartës i tij, si ka mundësi që nuk di se sa po vidhet nga vartësit e tij. Mua nuk më gëzon fakti që njerëzit të shkojnë në burgje. Por kush ka shkelur ligjin duhet të përballet me drejtësinë. Por jam për atë që të mos përdoren mish për top ata që ekzekutojnë vendimet, ndërkohë që ata që urdhërojnë zbatimin nuk i hyn asnjë gjëmb në këmbë. Nuk mund të mbahen në burg drejtorët e Veliajt se kanë aplikuar skemën e tij dhe Veliaj nuk pyetet”, tha Këlliçi.
