Të shtëna me armë zjarri është regjistruar pasditen e kësaj të mërkure në Durrës. Ngjarja ka ndodhur në një lokal në lagjen nr. 15, në zonën e ish-Kënetës.
Nga informacionet paraprake mësohet se një sherr brenda lokalit mes dy personave ka degraduar në një përplasje fizike dhe më pas njëri prej tyre ka qëlluar në ajër me armë zjarri, për të neutralizuar situatën e përplasjes.
Arma mendohet të ketë qenë e llojit “Shotgun”. Sherri dyshohet se ka ardhur për motive banale dhe dy personat e konfliktuar kanë qenë duke konsumuar alkool në lokal së bashku.
Fatmirësisht nuk raportohet për persona të lënduar por vetëm për dëme materiale. Policia ka mbërritur në vendin e ngjarjes dhe po heton për zbardhjen e plotë të rrethanave.
Policia bën me dije se autori është shoqëruar në komisariat, teksa ka qenë në gjendje të dehur kur ka qëlluar me armë zjarri.
Njoftimi:
Rreth orës 18:00, në lagjen nr. 15 Durrës, pas një konflikti për motive të dobëta shtetasi K. D., 29 vjeç, në gjëndje të dehur ka qëlluar me armë gjahu në ajër.
Shtetasi K. D, është shoqëruar në Komisariatin e Policisë për veprime të mëtejshme.
Grupi hetimor ndodhet në vendngjarje dhe po punon për sqarimin e rrethanave të rastit.
