Mungesa e kimios për pacientët me sëmundje tumoriale në spitalin Onkologjik në QSUNT vijon gjithnjë e të thellohet. Pavarësisht denoncimeve të shumta, nuk ka asnjë reflektim nga Qeveria dhe Ministria e Shëndetësisë, të cilët janë të fokusuar vetëm tek propaganda dhe jo shërbimi ndaj qytetarëve.
Së fundmi, gazetari Osman Stafa ka denoncuar rastin e një vogëlushi vetëm 2 vjeç, i cili është diagnostifikuar me tumor në bark dhe prej 10 ditësh mbahet pa trajtim në spital, pasi mungon kimio.
Në një postim në rrjetet sociale, Stafa shkruan se 2-vjeçari ka nevojë të nisë kimioterapinë dhe mes medikamenteve kimio që duhet të përdorë është edhe “Actinomycin D”, që ashtu si shumë medikamente të tjera mungojnë në këtë spital.
“Po të gjendet ilaçi, e lufton 75% të sëmundjes që ka fëmija. Kur nuk gjendet ilaçi, mjekohet me një tjetër por ulet mundësia e shërimit. Unë si nënë ndihem shumë e zhgënjyer prej shtetit tonë sepse as këtë medikament nuk e siguron për fëmijën, atëherë si të rrimë ne këtu?”– u shpreh nëna e vogëlushit.
Ajo i bëri thirrje edhe kryeministrit Edi Rama dhe ministres Albana Koçiu që të ndërhyjnë për të siguriar ilaçet jetësore.
Postimi i plotë i Osman Stafës:
ËSHTË VETËM 2 VJEÇ VUAN NGA KANCERI!
ÇFARË FAJI KA KY VOGËLUSH QË NUK KA KIMIO NË SPITAL?
ÇFARË MËKATI KA BËRË KY DJALË QË SHTETI SHQIPTAR, MINISTRIA E SHËNDETËSISË, NUK I MUNDËSON KIMIOTERAPINË?
DUHET TË KISHTE NISUR TRAJTIMI I TIJ ME KIMIO.
DJALI PO HUMBET KOHË TË VYER, PËR TË LUFTUAR PËR SHANSET E TIJ.
PREJ GATI 10 DITËSH, ËSHTË PA TRAJTIM.
MBAHET ATY NË SPITAL, PA DITUR ÇDO BËHET ME TË. KA NEVOJË PËR MEDIKAMENTIN “ACTINOMYCIN D”.
A NUK ËSHTË KJO KRIMINALE?
A NUK ËSHTË VEPËR PENALE?
Ministre e Shëndetësisë Albana Koçiu shko takoje djalin, e ke tek Pediatria Onkologjike, shko thuaji nënës së djalit se kur do të vijë ilaçi.
Kryeministri Edi Rama, kërkojini mikes suaj, Kryeministres Italiane, t’u bëj një nder e t’u japë mjekimin për këtë djalë, se Italia e ka. Është urgjent rasti i këtij djali. Kërkoni informacion, se mjekët e dinë sesa e fortë është sëmundja që po përballet ky fëmijë.
p.s Ju lutem, kush i njeh, tua nisin këtë post Prokurorit të Tiranës, Hysni Mulaj,
Gjyqtarit të Shkallës së Parë, Albert Meça, si dhe Gjyqtarit të Apelit, Dritan Hasani.
Ja pasojat e vendimeve tuaja.
Po të hetohej, dhe të viheshin përpara përgjegjësisë përgjegjësit, kjo situatë s’do ishte e tillë më.
Ky është një ndër rastet e shumta të denoncuara kur mungojnë ilaçe thelbësore për të mbajtur në jetë njerëzit e sëmurë me tumor.
Pavarësisht denoncimeve, duket se ende nuk ka ndërhyrje konkrete për të siguruar ilaçet që shpëtojnë jetë.
