Mungesa e tregut të patates ka detyruar prodhuesit e Divjakës ta magazinojnë në vend që ta shesin. Çmimi i ulët dhe nën kosto, ka detyruar fermerët të përdorin metodën e shtratifikimit për magazinimin e saj.
Ky çift pensionistësh tregojnë se do të shesin prodhimin nëse çmimi shkon mbi 50 Lekë për kg. Ata kërkojnë orientim dhe planifikim të tregut bujqësor, për të mos pasur probleme të tilla çdo vit.
“Pazari ra, vajti me 35 Lekë ne s’kemi leverdi. Të paktën të ngelet tek 50 Lekshi.”, tha fermeri per mikrofonin e TV Klan.
“Fermeri është i pambrojtur këtu. I bëjmë thirrje që të bëhet një rregullim që ti fermer do të mbjellësh këtë kulturë ti këtë. Ne s’kemi një drejtues dhe ne të gjithë o burra”
Sipas fermerëve, çmimi i shitjes ka rënë sepse në treg është importuar patate nga Egjipti. Shitja bëhet për tregun vendas, por mbiprodhimi i patates nga Korça dhe mungesa e orientuar e tregut, ka sjellë uljen e çmimit.
“Patate ka, por nuk ka treg. Shumë pak patate po merret.”
“Ne e grumbullojmë pastaj po doli tregu mirë po s’doli në kanal si gjithmonë. Me 3-3.5, nuk ja vlen ta heqësh”, tha ai.
Tokat e Divjakës mbillen 2 herë në vit me patate. Prodhimi është cilësor për shkak të tokës ranore dhe e gjithë sasia shitet në tregjet e vendit.
