Policia e Vlorës ka dalë me një komunikatë për mediat në lidhje me 68-vjeçarin që u gjet pa shenja jete në banesën e tij në lagjen “10 Korriku”.
Por, ndryshe nga çfarë është raportuar se i moshuari u gjet gjysmë i zhveshur dhe është dhunuar për vdekje, pasi është grabitur fillimisht, autoritetet japin një version të ri.
Sipas bluve të qytetit bregdetar, nga hetimet paraprake, viktima Bashkim Durmishi dyshohet se ka ndërruar jetë për shkak të atakut kardiak.
Gjithsesi, nuk dihet se si Policia e Vlorës ka dalë me këtë version, ku një rresht më poshtë në njoftimin e saj, nuk e mohon masakrimin e të moshuarit, teksa njofton se trupi është dërguar në morg për ekspertizë mjekoligjore.
Nisur nga detajet e mësipërme ngrihet pyetja nëse a po tenton Policia e Vlorës që të manipulojë vrasjen e të moshuarit për shkak të dështimit të saj, pasi edhe autori ka ikur në drejtim të paditur?
Njoftimi i plotë i Policisë së Vlorës:
Sot, rreth orës 19:02, në lagjen “10 Korriku”, Vlorë, është gjetur pa shenja jete në banesën e tij shtetasi B.D., 68 vjeç. Paraprakisht, dyshohet se 68-vjeçari ka pësuar arrest kardiak.
Trupi i 68-vjeçarit do të transportohet në morg për ekspertizë mjekoligjore, për të përcaktuar saktësisht shkaqet e dëmtimit të konstatuar në fytyrë dhe të vdekjes.
Grupi hetimor, nën drejtimin e Prokurorisë, po punon për sqarimin e plotë të rrethanave të kësaj ngjarjeje.
