Një shqiptar i shpallur në listën e personave të shumëkërkuar nga Italia, është arrestuar në Mançester të Anglisë ku dhe fshihej prej kohësh, për t’i shpëtuar vuajtjes së dënimit me 25 vite burgim për krime të rënda.
Mediat italiane shkruajnë se bëhet fjalë për Sajmir Oruci, 35 vjeç, zbarkoi nën pranga në aeroportin Linate të Milanos dhe ishte marrës i një urdhri për ekzekutimin e dënimit të lëshuar nga Zyra e Përmbarimit Penal të Prokurorisë Publike të Monzës.
Shqiptari u arrestua për llogari të Italisë më 3 dhjetor në Mançester (po vuante dënim për drogë pas ndalimit vitin e kaluar në Angli), pas një urdhër-arresti evropian dhe do të duhet të vuajë një dënim total prej 25 vitesh burg për krime të rënda, duke përfshirë: Veprat e përndjekjes, rrëmbimi, sulmi i rëndë seksual (përdhunim), dhuna seksuale në grup ndaj një vajze, që në kohën e ngjarjes ishte e mitur.
Dhuna daton në vitet 2015 dhe 2016, periudhë në të cilën i dënuari banonte në Besana Brianza. Për këto krime ai u dënua fillimisht nga Gjykata e Monzës me 12 vjet e 6 muaj. Më pas, dënimi u akumulua me të tjera të dhëna nga Gjykatat e Lecco dhe Milanos, për krimet e vjedhjes së rëndë dhe rezistencës ndaj një zyrtari publik, duke arritur në total 25 vjet.
Ndërkohë që nga verifikimet rezultoi se Oruci ndodhej në burgun britanik prej Nëntorit të vitit të kaluar, për akuzën prodhim dhe tregtim të lëndëve narkotike. Falë krahasimit të fotografive dhe gjurmëve të gishtërinjve, identiteti i tij u konfirmua.
Urdhri u ekzekutua më 3 Dhjetor, duke çuar në ekstradimin e tij më 19 Dhjetor në Monza.
