Drejtuesi politik i Partisë Demokratike për Tiranën, Belind Këlliçi, tregon se protesta e 23 dhjetorit është e rradhës, ku do të bllokohen disa rrugë.
Këlliçi tha se risia e kësaj proteste është pjesëmarrja e kreut demokrat, Sali Berisha, i cili u mbajt në arrest shtëpie për 333 ditë, pa asnjë provë e pa asnjë SPAK.
Këlliçi paralajmëroi se mund të ketë përplasje në këtë protestë, ndërsa shtoi se personalisht do të jetë në krye të protestuesve që do të qëndrojnë te Bashkia e Tiranës.
Në këtë kuadër, Këlliçi tha se Kryebashkiaku i Tiranës duhet të hetohet dhe përballet me drejtësinë, ose në të kundërt SPAK të ulë qepenat.
“Buxheti i Bashkisë së Tiranës është mbi 500 mln euro dhe ajo që i intereson qytetarëve të Tiranës është se ku shkojnë taksat e tyre. Pse duhet të paguajnë 13 mln euro për një incenerator që nuk ekziston”, tha Këlliçi në emisionin ‘Log’ në News24.
Ai theksoi se në protestat e fundit, si ajo e nëntorit ka pasur një përplasje për shkak të sjelljes së Policisë së Shtetit.
