Fitorja e parë e Ivan Gvozdenoviç në krye të stolit të Elbasanit ka ardhur në Korçë, pikërisht përballë ish-ekipit të tij Skënderbeut.
Verdheblutë kanë arritur të fitojnë me rezultatin e pastër 0-2 përballë korçarëve në ndeshjen e vlefshme për javën e 19-të të Kategorisë Superiore, duke e mbyllur kështu edhe vitin 2024 me fitore.
Pjesa e parë e lojës u mbyll me rrjeta të parekura, me Skënderbeun më kërkues, me disa raste shënimi, por pa gjetur golin, teksa pati edhe një rast të rishikuar nga VAR me korçarët që pretenduan penallti.
Edhe fraksioni i dytë i lojës nisi mirë për Skënderbeun, por goditja për ta do të vinte në minutën e ’64 të takimit. Një goditje nga distanca e Kristi Qoses u prit nga Marko Alia, por e la topin para tij, duke përfituar Arsne Lleshi, i cili e çoi topin në rrjetë.
Më pas gjithçka u bë shumë e vështirë për Skënderbeun, teksa në minutat shtesë do të vinte edhe goli i dytë. Nga një goditje këndi ishte Ze Gomes, ai i cili përfitoi pas një largimi jo të mirë të topit nga bardhekuqtë, duke shënuar golin e dytë për ekipin e tij.
Elbasani shkon në kuotën e 25 pikëve dhe qëndron në vendin e pestë, teksa kjo ishte fitorja e parë e Gvozdenoviç, pas humbjes në Shkodër dhe barazimit me Partizanin.
Ndërkohë, Skënderbeu vazhdon krizën, i cili ndodhet në vendin e fundit me 15 pikë dhe pas kësaj humbje shkon në 10 ndeshje pa fitore në kampionat.
