Gjykata e Posaçme ka dhënë këtë të premte vendimin për biznesmenin Bledar Shemaj, ortak e administrator i kompanisë “W Center” sh.p.k., si dhe për tre ish zyrtarë të “Ujësjellës Kanalizime” Tiranë, Ledia Ramo, Ortjon Dhami dhe Engjëll Dedja.
Ata akuzoheshin për abuzimin me tenderin me objekt “Blerje kimikate dhe karbon aktiv për UKT sh.a”, me vlerë 143.618.333 lekë pa TVSH.
Gjyqtarët Rudina Palloj, Etleva Deda dhe Bib Ndreca kanë vendosur të shpallin të pafajshëm tre ish-punonjësit e UKT-së Ledia Ramo, Ortjon Dhami dhe Engjëll Dedja, të cilët ishin marrë të pandehur për veprën penale “Shkelja e barazisë së pjesëmarrësve në tendera apo ankande publike”.
Ndërkohë, është dënuar vetëm biznesmeni Bledar Shemaj me 6 muaj burgim, i cili për shkak të gjykimit të shkurtuar i ulej në 4 muaj burgim.
Gjithsesi, ai nuk do të qëndrojë asnjë ditë në qeli, pasi GJKKO ia ka konvertuar dënimin në 8 muaj shërbim prove, me kusht që i pandehuri të mos kryejë vepër tjetër penale.
Bledar Shemaj është shpallur i pafajshëm për veprën penale “Falsifikimi i vulave, stampave ose i formularëve” dhe është dënuar vetëm për veprën penale “Falsifikimi i dokumenteve”.
Në përfundim të hetimeve është dalë në konkluzionin se dokumenti “Kontratë pune me datë 01.01.2019 me punëdhënës Shoqëria “W.Center” sh.p.k dhe punëmarrës shtetasi Q.B”, ka qenë i falsifikuar.
Kujtojmë se SPAK, në njoftimin për mediat kur përfundoi hetimet deklaronte se tre zyrtarët e UKT-së, gjatë procedurës së shqyrtimit të ankesave, kanë kanë ndryshuar njërin nga specifikimet e tenderit që kishte të bënte me figurimin në listëpagesa të një punonjësi manovrator të mjeteve të rënda (duke e hequr si kërkesë), për të favorizuar kompaninë e Bledar Shemjas.
Ndërkohë, sipas SPAK, Bledar Shemaj kishte paraqitur në këtë procedurë prokurimi një kontrate pune duke paraqitur rrethana të rreme mbi punësimin e shtetasit Q.M në shoqërinë e tij (si manovrator i mjeteve të rënda), specifikim për të cilin kishte patur ankesa më parë nga operatorë të tjerë, si dhe kishte paraqitur rrethana të rreme në deklaratën e plotësuar prej tij si dokument standard mbi kontratat e paraqitura për marrjen me qira të mjeteve me të cilat do të kryente shërbimet, në një kohë që nga zbatimi i kontratës rezulton se shërbimi është kryer duke përdorur mjete që i’u përkasin shoqërive të tjera.
Gjithsesi, në përfundim GJKKO ka vendosur të shpallë të pafajshëm 3 zyrtarët dhe të dënojë vetëm biznesmenin Bledar Shemaj.
