Pjesëmarrja në audicionet e “Power Kidz” në Tv klan kanë prodhuar një situatë të pakëndshme për qindra prindër e fëmijë pasditen e së mërkurës në mjediset e jashtme të këtij televizioni.
Fëmijët e klasave të katërta nga shkolla të ndryshme të Tiranës ishin njoftuar përmes një mesazhi për të marrë pjesë në audicionet e “Power Kidz” sezoni 8. Rubrika “Power Kidz” është pjesë e programit “E diela Shqiptare” në Tv Klan, ku çdo të dielë marrin pjesë 6 fëmijë në sfida të ndryshme dhe në fund dy prej tyre do të skualifikohen.
Siç shihet në mesazh thuhet se fëmijët do të futeshin me radhë sipas alfabetit të ndarë në dy fasha kohore, ora 16:00-18:00 dhe 18:00 e në vazhdim.
Por ajo që u pa dje në oborrin e Tv Klan ishte një pamje skandaloze. Asnjë rregull për të pritur fëmijët. Ndryshe nga sa ishte njoftuar, prindërit shtyheshin në radhë për të marrë formularin që duhej plotësuar para se fëmija të hynte në audicion.
Vetëm një pjesë prindërve arritën ta merrnin dhe më pas punonjësi që i shpërndante u largua pa dhënë asnjë shpjegim se çfarë do të ndodhte më tej. Në mes të temperaturave të ulëta, fëmijë e prindër kaluan orë në të tëra në pritje, siç shihet edhe në këto pamje.
Shumë prindër u shprehën të indinjuar nga kjo situatë, të cilën e konsideruan të turpshme dhe shfrytëzuese për fëmijët, ndërsa disa të tjerë vendosën të largoheshin.
“Këta po shfrytëzojnë fëmijët tanë dhe sillen në këtë mënyrë të turpshme dhe arrogante. Kjo është skandaloze”, u shpreh një prej prindërve në radhë.
“Ne erdhëm se na njoftuan nga shkolla me mesazh dhe nuk e dinim që këtu do përballeshim me këtë situatë. Asnjë rregull, asnjë komunikim”, tha një prind tjetër.
E gjithë kjo situatë “vrau” gëzimin e fëmijëve që besonin se pjesëmarrja në një konkurs televiziv është gjëja më e thjeshtë në botë për botëkuptimin e tyre. Por mesa duket për organizatorët e “Power Kidz” tallja me fëmijët është një situatë që su bën aspak përshtypje.
