Ilirjana Olldashi është gjyqtarja që është caktuar me short për të vendosur në Apelin e Posaçëm mbi ankimimet e bëra nga Ajola Xoxa dhe Arbër Veliaj, bashkëshortja dhe vëllai i kryebashkiakut të Tiranës, Erion Veliaj.
Ajola Xoxa dhe Arbër Veliaj kanë depozituar një padi në gjykatë, ku përmes saj kundërshtojnë veprimet e SPAK dhe GJKKO, në lidhje me kontrollin e ushtruar mëngjesin e 6 Dhjetorit në banesat e tyre dhe të familjarëve të tyre, si dhe në zyrat e fondacionit “Harabel”.
Avokatët e të dyve pretendojnë që kontrollet janë bërë në shkelje të ligjit procedurial për mungesë shkaku të ligjshëm.
Kreu i Bashkisë së Tiranës, Erion Veliaj në një reagim mbi hetimet e SPAK ndaj tij theksoi se agjentët e BKH-së kishin trokitur në derën e banesës së tij pa një vendim gjyqësor.
Kontrollet u ushtruan në bazë të një hetimi pasuror nga SPAK ndaj kryebashkiakut të Tiranës, Erion Veliaj dhe familjarëve të tij, teksa Ajola Xoxës iu sekuestrua edhe telefoni.
