Personi që shihni në foton e mëposhtme është 35-vjeçari Armand Spahiu, i cili mbeti i plagosur aksidentalisht mbrëmjen e djeshme në atentatin ndaj Kevin Hajrullës në Vlorë.
Ai ndodhej në vendin e tij të punës, ku po shiste fruta-perime, por breshëria e plumbave të kallashnikovit të krimit, nuk e kursyen as një qytetar të pafajshëm.
Burime bëjnë me dije se ai ka marrë një plumb në këmbë dhe ndodhet jashtë rrezikut pët jetën.
Në vendin ku ai mbeti i plagosur u gjet dhe një këpucë e tij, si dhe një shishe ujë, ku i ishte dhënë ndihma e parë nga qytetarët e tjerë të pranishëm.
Dyshohet se autorët kanë qenë tre veta, teksa ndaj automjetit tip “Benz” të Kevin Hajrullës, i cili ishte shënjestra e atentatit, janë zbrazur mbi 80 plumba, ku gëzhojat ishin shpërndarë kudo.
30-vjeçari Kevin Hajrulla mbeti i plagosur rëndë dhe ndodhet në spitalin e Traumës në Tiranë.
Ende nuk ka asnjë gjurmë nga autorët, teksa automjeti i tyre u gjet duke u djegur pranë fshatit Panaja, brenda të cilit u gjetën dhe dy kallashnikovët.
