Dy ditë më parë, famullitari i Katedrales sё Shkodrёs, Dom Vlash Palaj, përmes një statusi në rrjetet sociale, kritikonte Bashkinë e Shkodrës së drejtuar nga Benet Beci, për shkak se nuk kishte vendosur ende banderolat në qytet me urimin për Krishtlindjen.
Deklarata e tij është shpërndarë dhe ka marrë me qindra komente në rrjetet sociale, ku të shumtë kanë qenë intelektualët e qytetit verior, që shkruajnë se “Bashkia duhet të jetë në shërbim të të gjithë qytetarëve dhe të tregojë mirënjohje për diversitetin e besimeve fetare që e pasurojnë qytetin”.
Por, duket se shqetësimi që iu bë pushtetit lokal të drejtuar nga Benet Beci, ka shqetësuar edhe Kishln Katolike, e cila duket se është vendosur në krah të pushtetit.
Arqipeshkvi i Shkodrës, Imzot Angelo Massafra ka reaguar që të nesërmen dhe distancohet nga shqetësimi i ngritur nga famullitari i tij, Dom Vlash Palaj.
“Kisha Katolike në Shkodër përfaqësohet nga Shkëlqësia e Tij Imzot Angelo Massafra dhe jo nga Dom Vlash Palaj, famullitari, i cili ka postuar statusin në media sociale, dhe nga asnjë Meshtar tjetër, pa autorizimin e Arqipeshkvit. Për këtë arsye: Unë distancohem nga kjo mënyrë veprimi.” – thekson në një letër publike s, Imzot Angelo Massafra.
Sipas tij, postimi në rrjetet sociale i Dom Vlash Palajt, u përdor për qëllime personale apo politike kundër Benet Becit, por pyetja që shtrohet është se dhe letra publike e tij, që nuk ia kërkon askush, a nuk është për qëllime politike në mbrojtje të kryebashkiakut socialist të Shkodrës.
Teksa nuk i ndal falenderimet për pushtetin lokal të udhëhequr nga socialistët, Imzot Angelo Massafra shkruan se në vitet e kaluara urimet janë vendosur nga vetë komunitetet fetare.
“Shfrytëzoj rastin të falenderoj publikisht Bashkinë Shkodër për bashkëpunimin e veçantë për organizimin e Luminit të Martirëve të fesë Dom Gjon Gazulli dhe Atë Luigi Paliq.
Dëshiroj t’ju kujtoj gjithashtu, se në vitet e kaluara parullat me urimin për festat, janë prodhuar dhe vendosur nga vetë Komunitetet Fetare, me një leje të posaçme nga Bashkia. Propozoj që nga viti 2025 e në vazhdim të ndiqet e njëjta praktikë.” – shkruan ai.
Pra, nga një status në rrjetet sociale i një famulltari, Kisha Katolike e Shkodrës reagon rrufeshëm në mbrojtje të kryebashkiakut Benet Beci.
A është kjo Kisha e At Zef Pllumit dhe martirëve të tjerë katolikë që pushkatoi regjimi?! Me siguri JO. Kjo ngjan si Kisha e Benet Becit.
