Trajneri i Kastriotit, Stavri Nica, pas humbjes në Burrel njoftoi dorëheqjen. Ai lëshoi kritika të forta ndaj lojtarëve të skuadrës duke i quajtur pa karakter.
“Ndaj Burrelit, Kastriotit i mungoi dëshira dhe impenjimi për të luajtur. Problemi i kësaj skuadre është fakti se në përbërje të saj ka lojtarë pa karakter. Ne kishim dy-tre mungesa, që nuk kishim me kë t’i zëvendësonin. Dhe kjo vjen nga gabimet që janë bërë në përzgjedhjen e verës.
Duke deklaruar dorëheqjen, i sugjeroj drejtuesve të klubit që të shfrytëzojnë merkaton e dimrit për të gjetur lojtarë, që synojnë të ecin në karrierë dhe jo lojtarë që hiqen si lider”. Kjo ishte deklarata që trajneri i Kastriotit, Stavri Nica, pas humbjes në Burrel.
Por me sa duket drejtuesit e klubit, me në krye presidentin Alban Vogli, i cili është marrë vetë me këtë çështje, ka arritur që t’ia ndryshojë mendim trajnerit, për vijuar punën në krye të krutanëve.
Bindja e drejtuesve u pasqyrua në seancën stërvitore të ditës së djeshme, ku trajneri Nica udhëhoqi ekipin e Kastriotit, që ka nisur punën për ndeshjen e fundit të 2024-ës, ku të shtunën pret Erzenin.
