Elbasani vijon ecurinë me pikë të plota në Kategorinë e Parë të basketbollit për meshkuj, duke shënuar fitore të njëpasnjëshme. Verdheblutë shkatërruan Skënderbeun me rezultatin 112-55 (28-6, 23- 16, 39-19, 25-17), takim i vlefshëm për javën e nëntë, i zhvilluar në pallatin e sportit “Tomorr Sinani”.
Një përballje pa shumë histori, me Elbasanin që i mbylli llogaritë thuajse që në periodën e parë. Nicholas Paul me 22 pikë e 20 kërcime dhe David Thompson me 36 pikë, bënë diferencën në parket për ekipin elbasanas.
Kjo ishte fitorja e nëntë për Elbasanin, që i forcon pozitat në vendin e parë me 18 pikë. Të premten u zhvilluar gjithashtu edhe takimi Pogradeci-Flamurtari, sfidë që u buzëqeshi vlonjatëve, të cilët fituan 81-95 (16-19, 23-34, 14-22, 28-20).
Armelind Sotiri me 22 pikë e 9 kërcime, Erlado Kollovi me 12 pikë e 16 kërcime, Igli Berdo me 21 pikë e 11 kërcime si dhe Arlind Merkaj me 24 pikë e 10 asistime, udhëhoqën miqtë në këtë sukses. Java e nëntë u kompletuar të dielën me fitoren e Partizanit kundër Fierit në “Asllan Rusi” me rezultatin 96-68 (22-9, 30-22, 20-21, 24-16).
Të kuqtë e Erdal Borovës e kishin gjatë të gjithë kohës lojën nën kontroll, ndërsa në këtë takim shkëlqyen Pëllumb Bisheva me 23 pikë e 13 kërcime, si dhe Abdel Gjyzeli e Françesko Nikolli me 21 pilë secili. Për Fierin nuk mjaftuan 35 pikët nga Dathan Satchell.
Me këtë sukses, 33 herë kampionët e Shqipërisë mbajnë ritmin në ndjekje të Elbasanit, duke mbetur në garë për vendin e parë që të çon direkt në elitë.
