Nga Boldnews.al
Policia e Shtetit ka publikuar renditjen e aplikantëve që garojnë për 48 poste vakante në pozicionet e shefit të Komisariatit në Policinë e Shtetit.
Procedura u zhvillua në bazë të ligjit të ri “Për Policinë e Shtetit”, por disa nga emrat e renditur në pjesën fituese të listës tregojnë se institucioni e ka të vështirë të ndahet nga disa personazhe, mbi të cilët ka pikëpyetje për integritetin personal dhe profesional.
Në listën emërore “fituese” ka zyrtarë policorë pa çertifikatë sigurie, të dyshuar si të përfshirë në afera të ndryshme, subjekte në verifikim nga Agjencia e Mbikqyrjes Policore (AMP) apo edhe struktura të tjera ligjzbatuese.
Në dokumentin e publikuar nga Policia e Shtetit gjenden në listën “e sigurt” emra si Klaudio Zhupa, Bilbil Semanaj, e të tjerë.
Për këta personazhe, por edhe të tjerë në listën “fituese” gjenden të dhëna të ndryshme publike, për përfshirjen e tyre në situata të dyshimta jo-ligjore.
Përshembull, Bilal Semanaj u pezullua pak vite më parë nga detyra e shefit të Komisariatit të Cërrikut, pasi u dyshua për nxjerrje të sekretit hetimor. Ish-drejtori i përgjithshëm i Policisë, Ard Veliu, e dyshonte Semanaj si një nga personat që publikoi foto të një arsenali armësh të zbuluar nga “RENEA” në zonën periferike të Elbasanit.
Policia e Shtetit, pavarësisht ligjit të ri dhe ndryshimeve tërësore në strukturat drejtuese, sërish dëshmon se nuk ka aftësi të shkëputet plotësisht nga elementë, të cilët në karrierën e tyre nuk duket se e kanë nderuar si duhet uniformën.
Lexo edhe:
Gara për shefat e Komisariateve/ Zbardhet lista me pikët për secilin kandidat! Ja renditja
