Pasi ngritën dy herë kartonat e kuq në Kuvend me urdhër të shefit, Edi Rama për të mbrojtur mandatin e Olta Xhaçkës, tashmë socialistët e interpretojnë sipas qejfit edhe raportin e Komisionit të Venecias.
Duket se socialistët nuk kanë ndërmend të heqin dorë nga mbrojtja e Xhaçkës që shpalli bashkëshortin e saj, Artamn Gaçi investitor strategjik, në kushtet e konfliktit të interesit.
Komisioni i Venecias e theksonte qartë se vendimet e Gjykatës Kushtetuese nuk mund të bllokohen me shumicë parlamentare, pasi të gjitha autoritetet janë të detyruar që t’i zbatojnë.
Por, sipas kryetares së Komisionit të Ligjeve, Klotilda Bushkës, Komisioni i Venecias shprehet se Kuvendi nuk është i detyruar të votojë në mënyrë të caktuar, pasi sipas saj, deputetët janë të lirë në votim.
“Komisioni i Venecias konstaton se për më tepër se parimi se deputetët janë të lirë të votojnë sipas bindjeve të tyre konfirmohet nga Gjykata Kushtetuese, sikurse organet e Kuvendit kanë theksuar disa herë vendimet e Gjykatës Kushtetuese nuk mund të diskutohen. Kuvendi e njeh detyrueshmërinë e zbatimit të vendimeve të Gjykatës Kushtetuese. Komisioni i Venecias shpreh mendimin se dy vendimet nuk duhej të kushtëzojnë votën”, tha ajo.
Gjithashtu, Bushka e PS-së pretendon se Komisioni i Venecias konfirmon qëndrimin e mazhorancës se Kuvendi dërgon për shqyrtim në Gjykatë Kushtetuese çështjen e papajtueshmërisë së mandatit të një deputeti, vetëm kur vetë deputeti përdor pasurinë e shtetit dhe përfiton prej tyre. Sipas saj, rastet e tjera Kuvendi i shqyrton vetë.
“Komisioni i Venecias shprehet në këtë opinion se pas vendimit të Gjykatës Kushtetuese të vitit 2016, neni i ligjit të Gjykatës Kushtetuese është ndryshuar që t’i jepet e drejta 1/5 së deputetëve të paraqesin mocion. Megjithatë në vendimin e fundit Gjykata Kushtetuese duke mos e trajtuar ndryshimin e nenit 66 mban pozicionit se 1/5 e deputetëve nuk bën kërkesë në Gjykatën Kushtetuese.”, u shpreh Bushka.
Ajo tha më tej se kompetencat e Gjykatës Kushtetuese si organ gjyqësor dhe jopolitik nuk mund të shkelin rolin e parlamentit që krijon norma.
“Në përfundim tashmë bazuar në opinionin e Komisionit të Venecias pikëpyetjet e ngritura në lidhje me votimin kanë qenë të drejta dhe të bazuar në argumenta tërësisht kushtetues dhe ligjore. I gjithë ky proces, përtej retorikës politike pati një karakter tërësisht teknik dhe u trajtua nga ne bazuar në qëndrime juridike. Një vendim që nuk mund të bëhet objekt i diskutimit politik. Ashtu siç edhe e nënvizon Komisioni i Venecias, edhe Kuvendi e njeh detyrueshmërinë e zbatimit të Gjykatës Kushtetuese dhe nuk ka patur dhe nuk ka asnjëherë qëllim mos t’i zbatojë por duhet të jenë të tilla që Kuvendi të jetë në gjendje t’i zbatojë ato”, u shpreh Bushka.
Bushka nënvizoi se Gjykata Kushtetuese në rolin e vetë Kushtetues ka kompetencën e interpretimit të Kushtetutës dhe jo në krijimin e normave të reja kushtetuese që janë prerogativë e Kuvendit.
“Nuk ka pasur asnjë krizë kushtetuese por një situatë që kërkonte zgjidhje kushtetuese në respekt të parimit të shtetit të së drejtës. Komisioni i Venecias vë ekuilibrin mes respektit të ndërsjellë, nevojës për të pasur të drejtë deputetët të votojnë të lirë dhe detyrimit për të zbatuar vendimet e qarta të Gjykatës Kushtetuese”, tha Bushka.
Mandati i Xhaçkës/ “Venecia”: Mazhoranca nuk duhet të bllokojë vendimet e Kushtetueses
