Një operacion anti-droge është zhvilluar nga Policia e Tiranës ku është kapur mbi 1 kg kokainë në Tiranë dhe si rezultat janë arrestuar dy persona.
Në kuadër të operacionit të koduar “Fam Fanz” janë vënë në pranga shtetasit Klajdi Serjani, 24 vjeç, dhe Euxhenjo Manushi, 20 vjeç, të dy banues në Tiranë.
Burime bëjnë me dije se Klajdi Serjani është nipi i Pajtim Serjani, një prej personazheve të njohur të botës së krimit në kryeqytet, miku i Emiljano Shullazit, teksa në vitin 2015 i ka shpëtuar edhe një atentati me armë zjarri. Ndërsa, 20-vjeçari Euxhenjo Manushi është djali i muzikantit të njohur saksofonist Adriano Manushi, i njohur me emrin e artit si Ad Sybardhi.
Blutë e kryeqytetit bëjnë me dije se kanë ndaluar në rrugën “Kastriotët” automjetin me drejtues Klajdi Serjanin dhe pasagjer Euxhenjo Manushi. Gjatë kontrollit fizik që i është bërë Klajdi Serjani, i është gjetur 1 kilogram e 50 gramë lëndë narkotike kokainë.
Burimet zyrtare bëjnë me dije se kokaina kapte në treg vlerën e 270 mijë eurove. Droga është sekuestruar në cilësinë e provës materiale, së bashku me një shumë parash dhe celularët e dy të arrestuarve.
Burime bëjnë me dije se dy të arrestuarit ishin në ndjekje dhe në përgjim nga sektori i anti-drogës në Policinë e Tiranës prej 6 muajsh dhe mbrëmjen e djeshme janë ndaluar me mjetin luksoz në afërsi të Institutit. Mësohet se sapo kanë ndaluar, ata kanë dalë nga automjeti me çantën me drogë dhe aty ka ndërhyrë Anti-droga duke iu vendosur prangat.
Burime bëjnë me dije se grupi i dy të arrestuarve operonte me shpërndarjen e drogërave të forta në zonën e ish-Parkut të Autobusëve në Tiranë.
Materialet i kaluan Prokurorisë së Tiranës për veprime të mëtejshme.
Kush është Pajtim Serjani?
Pajtim Serjani është një prej personazheve të njohur të botës së krimit në Tiranë, teksa njihet si mik i Emiljano Shullazit dhe Gilmando Dani.
Ai ka qenë një subjekt i OFL-së, pasi është arrestuar dhe dënuar për gjobëvënie me tre vite, ndërsa aktualisht është i lirë, pasi e ka përfunduar dënimin.
Më 5 Janar të viti 2015, Pajtim Serjani u qëllua në një lokal në “Rrugën e Kavajës” nga 42 -vjeçari Arianit Sterjo, person i cili mbeti i vrarë nga plumbat e efektivit të policisë Roland Meta. Lidhur me këtë ngjarje asokohe u arrestuan Aurel dhe Amarildo Hoxhallari.
Ndërkohë, në Prill të atij viti, Pajtim Serjani u arrestua bashkë me tre të tjerë për një gjobvënie prej 13 mijë eurosh, ndaj një biznesmeni kafeje tek Rruga e Kavajës, në varësi të xhiros që kryente. Ai u dënua me 3 vite burgim.
Në shtator të vitit 2017, Policia i sekuestroi Pajtim Serjanit katër makina të blinduara më vlerë 1 milion euro. Tre prej makinave rezultuan të trafikuara nga vendet e BE, njëra prej të cilave me targa të falsifikuara.
Ai u procedua penalisht dhe gjatë operacionit “Fijet” për vendosjen e kamerave të sigurisë në mënyrë të paligjshme në ambiente publike.
Gjithashtu, Pajtim Serjani është arrestuar edhe në vitin 2012 për moskallëzim krimi, pasi në 5 Prill të atij viti ka qenë objekti i një sulmi nga persona të armatosur në Yzberisht.
*Pamjet e operacionit të mbrëmjes së djeshme
