Një sëmundje misterioze, e cila i ka marrë jetën e 79 personave në Republikën Demokratike të Kongos, shumica prej tyre fëmijë, ka nxitur shqetësime globale.
Ministria e Shëndetësisë në Itali ka dhënë urdhër për rritjen e vigjilencës në portet dhe aeroportet, veçanërisht për fluturimet nga Kongo.
Autoritetet lokale dhe Organizata Botërore e Shëndetësisë (OBSH) po punojnë për të përcaktuar shkakun e shpërthimit të kësaj epidemie.
Nderkohë që rrezikon dhe Shqipërinë, pasi shumë emigrantë shqiptarë që jetojnë në Itali, vijnë në atdhe pranë familjeve të tyre për festat e fundvitit!
Rasti është raportuar në provincën Kwango, në një zonë të largët ku mungojnë infrastruktura shëndetësore dhe uji i pijshëm. Deri më tani, simptoma si ethe, kollë, dhimbje koke dhe vështirësi në frymëmarrje janë vërejtur kryesisht te fëmijët nën moshën pesë vjeç. OBSH ka përjashtuar Covid-19 si shkaktar, ndërsa mbetet i mundshëm një patogjen respirator ose një sëmundje si malaria apo fruthi.
Epidemiologët theksojnë se vdekshmëria e lartë, rreth 30% e rasteve, është shqetësuese. Specialistët po krahasojnë sëmundjen me sëmundjet hemorragjike si Ebola, por simptomat janë të ndryshme. Ekspertët italianë të shëndetësisë kanë kërkuar vëmendje të shtuar ndaj situatës, duke theksuar se viruse të tilla mund të përhapen shpejt në një botë të globalizuar.
Ndërkohë, autoritetet në Kongo dhe ekipet ndërkombëtare janë duke hetuar dhe duke siguruar mostrat për analiza të mëtejshme në laboratorë të specializuar. Mbetet e paqartë nëse kemi të bëjmë me një patogjen të ri apo një sëmundje ekzistuese me prezantim të pazakontë.
