Me urdhër të SPAK, oficerët e BKH-së kanë ushtruar kontroll në banesë e kreut të Bashkisë së Tiranës, Erion Veliaj tek zona e “Kodrës së Diellit” në kryeqytet.
Burime për mediat bëjnë me dije se kanë qenë 5 oficerë të BKH-së, që janë paraqitur rreth orës 08:00 në banesën e Veliaj me mandate kontrolli, por janë përballur me një situatë të pazakontë, pasi familjarë të tij, nuk kanë pranuar t’u hapin derën për kontroll. Vetëm pas mbi 1 orë pritje, oficerët e BKH janë futur për kontroll në banesën e kryebashkiakut ku ndodhen edhe aktualisht.
Burime bëjnë me dije se kontrolli është ushtruar me vendim gjykate, i firmosur nga prokurori i SPAK, Ols Dado. Gjatë kontrollit, oficerët e BKH-së kanë sekuestruar telefonin e Ajola Xoxës, bashkëshortes së Erion Veliajt.
Ndërkohë që agjentëte BKH-së kanë shkuar në banesën e Erion Veliajt, mësohet se kryebashkiaku nuk ndodhet aty, pasi është në një vizitë dy ditore në Hamburg të Gjermanisë.
Prej kohësh, Veliaj është nën hetim pasuror nga SPAK, teksa është i përfshirë edhe në dosjen e inceneratorit të Tiranës, si dhe atë “5D” të drejtorëve të Bashkisë, por deri më tani Prokuroria e Posaçme nuk ka ngritur asnjë akuzë ndaj tij.
Në muajin maj ndaj Veliajt ka filluar procedimi penal për hetimin pasuror dhe se SPAK ka kërkuar t’i vendoset në dispozicion çdo veprim bankar dhe çdo transaksion financiar nga kryebashkiaku, bashkëshortja e tij Ajola Xoxa, i vëllai Arbër Veliaj dhe nëna Shqiponjë Veliaj.
Më 30 Prill të këtij viti, Erion Veliaj dëshmoi për herë të parë dhe të vetme deri tani në SPAK, në lidhje me dosjen e inceneratorit të Tiranës, ku qëndroi për rreth 7 orë.
