Supersfida e javës së 16-të, mes Partizanit dhe Egnatias nuk prodhoi fitues, pasi u mbyll në barazim 1-1, pas një fundi spektakolar. Christian Mba zhbllokoi rezultatin në minutën e 34-t, duke i dhënë avantazhin të kuqve, ndërsa miqtë barazuan në fund.
Bakayoko në minutën e 90-të, me një roveshatë, e ndali topin në fundin e rrjetës, duke barazuar shifrat. Festa nga sulmuesi i Egnatias e çmendur, duke hequr bluzën dhe duke shkuar te tifozët rivalë.
Për këtë arsye, arbitri e ndëshkoi me dy kartonë të verdhë dhe më pas të kuqin, për ta përjashtuar nga loja. Me këtë barazim, Partizani mban vendin e parë me 29 pikë, ndërsa Egnatia renditet në vendin e dytë me 27 pikë.
Nuk prodhoi fitues as sfida mes Skënderbeut dhe Tiranës, e cila u mbyll ne barazim pa gola. Trajneri Ernest Gjoka, debuton kështu me barazim te skuadra korçare, aty ku pasoi Ivan Gvozdenovic.
Në Korçë, ishte një ndeshje e vakët dhe me raste të pakta për shënim nga të dyja ekipet. Vendasit iu afruan dy herë golit me Rashicën, por sulmuesi u ndal nga portieri Selmani.
Me këtë barazim, Skënderbeu mban vendin e parafundit me 14 pikë, ndërsa Tirana renditet në vendin e shtatë me 17 pikë.
